QR Premer-Ministri Asqar Mamin qurylys qaldyqtaryna arnalǵan poligondar salýdy tapsyrdy, dep habarlaidy QazAqparat.
«Óńirlerde ruqsatsyz qoqys úiindileriniń, sonyń ishinde, qurylys qoqystarynyń paida bolý sebepteriniń biri – elde qurylys poligondarynyń bolmaýy jáne jalpy poligondardyń talaptarǵa sáikes kelmeýi bolyp otyr. Indýstriia ministrligine Ekologiia jáne Qarjy ministrlikterimen birlesip, turmystyq qatty qaldyqtarǵa arnalǵan poligonnyń úlgilik jobasyn ázirleýdi tapsyramyn. Al ákimdiktermen birlesip, qoldanystaǵy zańnamanyń jańa talaptaryna sáikes, qurylys poligondaryn salý máselesin pysyqtasyn», - dedi Asqar Mamin Úkimettiń búgingi otyrysynda.
Sonymen birge, Premer-Ministr káriz-tazartý qurylystary máselesi de ózekti ekenin, olardyń sanitariialyq-ekologiialyq talaptarǵa sáikes kelmeitinin aitty. Sondyqtan Indýstriia ministrligine ákimdiktermen birlesip, osy baǵyttaǵy jumysty jandandyrýdy tapsyramyn.
«Ákimdikter biylǵy aǵash otyrǵyzý josparlaryn oryndasyn. Jalpy kógaldandyrý, otyrǵyzylatyn aǵashtardyń ári qarai ósip ketýi ákimdikterdiń turaqty baqylaýynda bolýy kerek. Sondai-aq, otyrǵyzý materialyn ósirý úshin tálimbaqtar men orman sharýashylyqtarynyń jai-kúiine nazar aýdarylsyn», - dep tapsyma berdi Asqar Mamin.
