.jpg)
«Turkistan» halyqaralyq áýejaiynda oqshaýlaý rejimin buzǵan azamat anyqtaldy. Statýsy «qyzyl» tústi kórsetken Túrkistan qalasynyń turǵyny reiske jiberilgen joq, dep habarlaidy "Ult aqparat" QR Densaýlyq saqtaý ministrligi Sanitariialyq-epidemiologiialyq baqylaý komitetiniń baspasóz qyzmetine silteme jasap.
Baspasóz qyzmetiniń málimetterine qaraǵanda, 1 maýsymnan bastap úi karantininde jatqan Túrkistan qalasynyń turǵyny 10 maýsymda ózin-ózi oqshaýlaý kezeńiniń aiaqtalýyn kútpesten qaladan ketýge tyrysqan. Azamattyń koronavirýstyq infektsiiaǵa shaldyǵýyna bailanysty karantinge jatqyzylǵan ýaqytynan 14 kún ótpegendigi jóninde «Turkistan» halyqaralyq áýejaiynda Ashyq jobasy aiasynda belgili boldy.
Sanitariialyq-epidemiologiialyq qyzmet organdary oqshaýlaý rejimin buzýshyǵa ákimshilik aiyppul saldy. ÁQBtK-niń 452 babyna sáikes onyń mólsheri 87 510 teńgeni quraidy.
Túrkistan oblysynda 10-15 maýsym aralyǵynda Ashyq aqparattyq platformasynyń kómegimen ózin-ózi oqshaýlaý rejimin buzýdyń 6 jaǵdaiy tirkelgen. Qyzyl tús 2 paidalanýshyda, sary tús 4 paidalanýshyda anyqtalǵan.
Eske salaiyq, 10 maýsymda Qazaqstanda KVI-ǵa shaldyqqan naýqastar jáne olarmen bailanysta bolǵan adamdar úshin oqshaýlaýdyń mindetti rejimin kózdeitin sanitariialyq-epidemiologiialyq talaptar kúshine engen bolatyn. Ózin-ózi oqshaýlaý rejimin buzýshylar Ashyq aqparattyq platformasynyń kómegimen anyqtalady.
