Búgin Qazaqstan musylmandary dini basqarmasynyń tóraǵasy Naýryzbai qajy Taǵanuly Shymkent qalasynda ziialy qaýym ókilderimen kezdesti, dep habarlaidy "Ult aqparat" QMDB baspasóz qyzmetine silteme jasap.
Rýhani basqosý ult ustazy Ahmet Baitursynulynyń rýhyna qasietti Quran hatym duǵasyn baǵyshtaýdan bastaldy.
«Osy rette ózderińizben toi ótkizý ádebine qatysty pikirleskim keledi. Toida qariialar aldynda túrli qylyq kórsetip, anaiy bileý, ádepsiz oiyndardyń uiymdastyrylýy siz ben bizdi bei-jai qaldyrmasy anyq. Osy rette toidy uiymdastyrýshy azamattarǵa aitarym: qýanyshty bólisýdiń ózindik ádebin saqtasaq degim keledi. Sizder de osy máseleni óz ortalaryńyzda aita júrseńizder degen tilegim bar.
Ekinshiden, el ishinde as berý men zirat kóterýde ysyrapqa jol berip jatqan jandar az emes. Osy máselege de qariialarymyz nazar aýdaryp, qoǵamnyń qaperine sala júrse. Záýlim kesene turǵyzýǵa, asta-tók as berýge jumsalǵan artyq shyǵyn qaiyrymdylyqqa, halyqty aǵartý isine berilse nur ústine nur bolar edi» - dedi Naýryzbai qajy Taǵanuly.
Ziialy qaýym ókilderi Bas múfti kótergen máseleni qoldaitynyn bildirip, óz oilaryn ortaǵa saldy. Basqosýda jastardy destrýktivti dini aǵymdardyń ideologiiasynan saqtandyrý, imamdardyń bilimin jetildirý, as berý, zirat kóterýde ysyrapqa jol bermeý t.b. máseleler talqylandy.
Aita keteiik, kezdesýge memleket jáne qoǵam qairatkerleri – Orynbai Rahmanberdiev, Beket Turǵaraev, Shalatai Myrzahmetov, Ábilqasym Dosbolov, Shymkent qalalyq ardagerler uiymynyń tóraǵasy Kenjehan Tólebaev, QMDB Aqsaqaldar keńesiniń múshesi Nurkóz Jańabaev t.b. ziialy qaýym ókilderi qatysty.
