Arqarly asýynda tabylǵan petroglifterdi saqtaý máselesi ýákiletti memlekettik organdardyń baqylaýyna alyndy. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy "Ult aqparat".
«Almaty oblysynyń Kerbulaq aýdanynda (Arqarly asýy) tabylǵan petroglifterdi saqtaý máselesi ýákiletti memlekettik organdardyń baqylaýyna alyndy. Búgingi kúni ejelgi petroglifterdiń saqtalýyn qamtamasyz etý maqsatynda naqty is-sharalar qabyldanýda. Atap aitqanda, Arqarly asýynda qiyrshyq tastardy óndirýmen ainalysatyn kásiporyndarǵa berilgen arheologiialyq eskertkishter ornalasqan jerler memlekettiń ieligine qaitarylady. Arqarly petroglifteriniń zańnamada belgilengen tártippen mártebesi anyqtalǵanǵa deiin olar tarihi-mádeni mura obektileriniń aldyn-ala esepke alý tizimine engizildi», - delingen vitse-premerdiń jaýabynda.
Onyń atap ótýinshe, «Tarihi-mádeni mura obektilerin qorǵaý jáne paidalaný týraly» Zańyna sáikes petroglifterdiń mártebesi týraly túpkilikti sheshim qabyldanǵanǵa deiin olar tarih jáne mádeniet eskertkishterimen birdei qorǵalady. Osyǵan orai eskertkishterge qaýip tóndiretin jumystar toqtatylǵan jáne olardyń qorǵaýǵa alynǵany týraly taqtalar ornatylǵan.
«2021 jyldyń sáýir-mamyr ailarynda Almaty oblysynyń ákimdigi men Á.H. Marǵulan atyndaǵy Arheologiia institýtynynyń mamandary Arqarly petroglifterine zertteý jumystaryn júrgizdi. Zertteýdiń negizinde anyqtalǵan eskertkishterge aldaǵy ýaqytta qujattandyrý (pasportizatsiialaý) jumystary júrgiziledi. Anyqtalǵan eskertkishterdi qorǵalýyn uiymdastyrý úshin tiisti biýdjettik ótinim ázirlenip, oblys máslihatynyń otyrysynda qarastyrylady. Zańnamada qarastyrylǵan rásimder oryndalǵannan keiin Arqarly petroglifteri Almaty oblysynyń jergilikti mańyzy bar tarih jáne mádeniet eskertkishteriniń tizimine engiziledi. Mádeniet jáne sport ministrligi men Almaty oblysynyń ákimdigine Arqarly petroglifterin qorǵaý máselesin turaqty baqylaýda ustaý tapsyryldy», - dep atap ótedi Eraly Toǵjanov.
