Karantin sharalary bes topqa bólinedi. Bul týraly QR bas memlekettik sanitar dárigeri Aijan Esmaǵambetova QR Densaýlyq saqtaý ministrliginiń media ortalyǵynda ótken tikelei efirde aitty, dep habarlaidy QazAqparat.
«Karantin rejimin jumsartýdy úsh kezeńge bóldik. Birinshi kezeń aýyrǵandar sanynyń artýyna bailanysty, iaǵni bir apta ishinde koronavirýspen aýyrǵandar sany 7%-dan aspasa, karantin rejimin jeńildetýdiń birinshi kezeńi degen sóz. Bir apta ishinde aýyrǵandar sany 5%-dan aspasa, karantin rejimin jeńildetýdiń ekinshi kezeńi bastalady. Bul shara ár óńirdiń epidemiologiialyq jaǵdaiyna bailanysty qabyldanady. Bir apta ishinde aýyrǵandar sany 2%-dan aspasa, karantin sharalaryn jeńildetýdiń úshinshi kezeńi bastalady», - deidi QR Bas memlekettik sanitarlyq dárigeri Aijan Esmaǵambetova.
Onyń aitýynsha, karantin sharalary bes topqa bólinedi.
«Karantin sharalarynyń birinshi toby eńbek ujymdarymen bailanysty, iaǵni jumys ornyna shyǵýdyń qalypqa kelýimen bailanysty. Jumysqa qyzmetkerlerdiń 50% shyǵa alady. Qalǵandary qashyqtan jumys istegeni durys. Ekinshi top bilim berý qyzmetterimen bailanysty. Balabaqshalarda kezekshi top jumys isteidi jáne ondaǵy bala sany 15-ten aspaýy kerek. Úshinshi top qyzmet kórsetýshi men qyzmet alýshyǵa qatysty bolmaq. Qyzmet kórsetý barysynda meditsinalyq maska taǵyp, qaýipsizdik sharalaryn saqtaý mindetti. Tórtinshi top turǵyndardyń qozǵalysymen bailanysty. Atyraý, Batys Qazaqstan oblysy men Shymkent qalasynan basqa óńirlerde áýe qatynasy qalypqa keledi. Temirjol men kólik qatynasy áli birinshi deńgeide tur, sondyqtan júrýge tyiym salynǵan. Óńiraralyq blokposttar jumysyn jalǵastyra beredi. Aimaq ishinde blokpost qoiý-qoimaýdy bas sanitar dáriger ákimdikpen birge sheshedi. Ár aimaq, aýdannyń epidemiologiialyq jaǵdaiy esepke alynady. Besinshi top aimaq ishindegi qozǵalyspen bailanysty. Aýlaǵa shyǵýǵa, sportpen shuǵyldanýǵa ruqsat etemiz, biraq toptasyp júrýge bolmaidy, iaǵni bir otbasy músheleri shyǵýǵa bolady nemese úshten artyq adam birge júrýine bolmaidy», - deidi ol.
