"Arabtarǵa turmysqa shyqqan qazaqstandyq úsh qyz bastan ótkergen oqiǵalaryn NewTimes.kz basylymynyń tilshilerine aityp berdi", - dep jazady kaz.tengrinews.kz.
Olardyń biri - Taldyqorǵannyń 29 jastaǵy turǵyny Darina. Ol Birikken Arab Ámirlikterine 400 myń teńgeden joǵary jalaqy úshin barypty. Sol jaqta ol orta jastaǵy baiqýatty arabpen tanysady. Sóitip, er adam bir ai ótkende oǵan turmysqa shyǵý týraly usynys aitqan. Osylaisha tirshiliktiń qamyn umytyp, qolastynda qyzmetshisi bar záýlim úide kúieýinen áshekei buiymdar men ystyq mahabbattyń raqatyn kórý týraly múmkindik paida bolady. Al eń bastysy - oǵan bala bosanyp berý, ul bala.
"Meniń kúieýim baiqýatty adam, saǵattap jalaqy alady. Úshinshi áielge bar múmkindigi jetedi, alaida qazir ol bizge tipti internettiń tólemin de bermeidi. Nekeleskenimizge birneshe jyl boldy, úsh balamyz bar, eń jamany, eshqaisysy ákesine uqsamaǵan, barlyǵy ashyq reńdi. Qyzdarymdy tipti adam eken demeidi, jaqtyrmaidy. Balalarym bolsa mektepke de barmaidy, oqýyna ákesi bola tura aqsha bergisi de joq. Aqshasy joq emes, turmysymyzdy ápsátte kóterip tastaityn jaǵdaiy bar, mektep pen Internettiń aqysyn tóleýge, kóshede erkin serýendeýime jaǵdai jasai alady. Biraq qalamaidy", - deidi Darina.
Al Shymkenttiń 27 jastaǵy týmasy, alaida qazir Dýbaida turatyn Marjan oqiǵasyn bylai baiandaidy: "Ámirlikterde sheteldikter tek ekinshi áiel bola alady, jurty shariǵat zańy boiynsha arab qyzdarynyń birinshi áiel bolýyn qup kóredi. Kúieýim bai adam, birinshi áieli bar. Dýbaidaǵy ómirimdi bulai elestetpeppin. Bastapqyda barlyǵy jaqsy bolatyn, bala bosanyp bergennen keiin ózgerip shyǵa keledi. Kúieýimniń ruqsatynsyz eshqaida da shyǵa almaimyn. Óz erkim joq, ol qalaǵan kiimdi kiemin. Ol talap etken asty ǵana ishemin. Úi janýary sekildimin. Arabtardyń áielderinde eshqandai da quqyq joq. Jumys isteýge tyiym saldy. Bar sharýam - úide otyrý, eshqaida shyqpai kútý ǵana. Jumysynda bir máseleler shyǵyp qalsa da, basqa qiyndyqtary týsa da, men kináli bolyp shyǵa kelemin. Sońǵy kezderden beri qol kótere bastasa, kameraǵa túsirip alýǵa ádettendim. Politsiia shaqyrǵannan keiin ǵana sabasyna túsedi. Biraq balalarymdy jaqsy kóredi. Kóńilge medet bolatyny - osy ǵana, osy úshin ǵana ómir súremin".
Onyń aitýynsha, Ámirlikterge Qazaqstannan barǵan qyzdar óte kóp eken. Áielder ózara bailanysyp, bir-birine qoldaý bildirip júredi eken. Tájiribe almasyp, keńester aitady.
Basylymǵa suhbat bergen úshinshi qyz - Qostanaidyń 31 jastaǵy týmasy - ajyrasyp ketse de, Dýbaida qalyp qoiypty. "Uryp-soǵyp, úrkitkennen keiin osyǵan bel býdym. Osylai taǵy jalǵasqanda qyzym ekeýmiz aman qalmas edik. Baqytymyzǵa orai, zorlyq-zombylyq kórgenimdi dáleldei aldym, sóitip qana ajyrastyq. Balam ul bolǵandyqtan, oǵan ońaiyraq, sebebi bul elde 70 paiyz erler, qalǵan 30 paiyzy ǵana áielder. Balalaryma memleket baspanasyn tóleidi, tamaqqa chek beredi, mektebin de tóleidi, meditsinalyq qyzmetin de tólep beredi. Men Qazaqstan azamatshasy bolǵandyǵymnan, em alýǵa qyzmet tegin emes, tek jeńildik alyp turamyn, sebebi arabtyń balalaryn tárbielep otyrmyn", - deidi aty-jónin ataǵysy kelmegen qyz.
Basylymnyń málimetinshe, bul oqiǵalardan asyp túsetin jaǵdailar bar. Áielder múgedek bolyp qalatyn nemese óz-ózine qol jumsaýǵa itermeleitin jaǵdailardyń bolǵanyn aitady, sebebi, arab elderinde er adamdarǵa sot joq eken.
"Alaida qyzdar kúieýge shyǵý týraly railarynan qaita ma degen suraqqa birkelki jaýap qatpaidy. Soǵan qaraǵanda, balalary úshin jáne baiqýatty ómir úshin qazaqstandyqtar osyndai qatygezdikterge tózýge de daiyn. Ámirlikterdiń biligi arab balalarynyń analaryn ash-jalańash, úisiz-kúisiz qaldyrmaidy, deidi qyzdar. Mundai ómir úshin olar bostandyqtaryn da qiiýǵa daiyn", - dep jazady maqala avtory.
