Foto: ashyq derekkóz
Shymkent turǵyndaryn taqyrǵa otyrǵyzyp, shetelge qashyp ketken alaiaq elge qaitaryldy. Qazaqstannyń Bas prokýratýrasy men Ishki ister ministrliginiń Interpol qyzmetkerleri Túrkiianyń Antalia qalasynan seriialyq alaiaqtyq jasady dep aiyptalǵan azamatty ekstraditsiialady, dep habarlaidy Ult.kz.
Tergeý málimetteri boiynsha, kúdikti 2019–2020 jyldar aralyǵynda Shymkent qalasynyń tórt turǵynyn aldap, olardyń qomaqty aqshasy men jer ýchaskelerin iemdengen. Jábirlenýshilerge keltirilgen jalpy shyǵyn kólemi 95 million teńgeni quraidy.
Qylmysyn jasaǵan soń, ol jaýapkershilikten jaltarý úshin halyqaralyq izdeýge jariialanǵan bolatyn. Qazaqstan Elshiliginiń qoldaýymen júrgizilgen kelissózder nátijesinde ol Túrkiia aýmaǵynda ustalyp, Otanyna jetkizildi.
Qazirgi ýaqytta kúdikti tergeý izoliatoryna qamaldy. Eger onyń kinási dáleldense, múlki tárkilenip, 7 jyldan 12 jylǵa deiin bas bostandyǵynan aiyrylýy múmkin.
