8 aqpanda saǵat 02.20-da Almaty qalasy Medeý aýdanynyń Taý-Samal shaǵyn aýdanynda aldyn ala aqparat boiynsha tehnogendik sipattaǵy topyraqtyń ylǵaldanýynan lai kóshkini tústi, dep habarlaidy QR Tótenshe jaǵdailar ministrliginiń baspasóz qyzmeti.
Baspasóz qyzmetiniń málimetterine qaraǵanda, oqiǵa ornyna Qazseldenqorǵaýdyń, Almaty qalasy 109 qutqarý qyzmetiniń, Respýblikalyq jedel-qutqarý jasaǵynyń, Almaty TJD kúshteri men quraldary jiberildi. Oqiǵa ornyna kelgen kezde lai kóshkini saldarynan eki úige zaqym kelgeni anyqtaldy.
Oqiǵa ornynda TJD basshylyǵy bar. TJM Respýblikalyq jedel-qutqarý jasaǵynyń qutqarýshylary tekserý júrgizýde.
Jaǵdaidy taldaýǵa sáikes, qardyń edáýir mólsheriniń túsýine bailanysty orta taýly jáne biik taýly aimaqtarda taýlardyń betkeilerindegi qardyń turaqsyzdyǵyna bailanysty qar kóshkini qaýpi bar.
Tehnogendi sipattaǵy topyraqtyń batpaqtanýynan kólemi 3200 tekshe metr lai kóshkini tústi. 2 jeke turǵyn úige, onyń ishinde bireýine ishinara zaqym keldi.
Aldyn ala aqparatqa sáikes, úilerde tórt adam, onyń ishinde eki bala bolǵan.
Oqiǵa ornynda "Qazseldenqorǵaý" MM, Almaty qalasynyń "109 qutqarý qyzmeti" MM, Respýblikalyq jedel-qutqarý jasaǵynan, Almaty qalasy TJD, TJM 28237 áskeri bóliminen, jedel meditsinalyq kómek brigadasynan, Medeý aýdanynyń ákimdiginen 160-tan astam adam jáne 30 birlik tehnika jumyldyryldy.
Jaqyn mańdaǵy úilerdiń turǵyndary evakýatsiialandy. Jinaý pýnktine ornalastyrylǵannan keiin birneshe saǵat ótken soń, turǵyndar óz erkimen dostary men týystaryna ketti.
Dárigerler brigadasy kezekshilikti jalǵastyrýda. Jergilikti jerde TJD psihologiialyq toby jumys jasaýda.
Aita keteiik, lai kóshkini - bul erigen, jańbyr nemese jer asty sýlarynyń balshyq tárizdi kúige qanyǵýyna bailanysty aýyrlyq kúshiniń áserinen tómen qarai jyljyǵan tereńdigi bir metrge deiingi qýaty az topyraq qabatynyń jolaǵy.
