Almatylyqtar sanaqqa onlain formatta qatysa alady. Bul týraly onlain brifing barysynda qalalyq statistika departamentiniń basshysy Aidar Ábildabekov málim etti, dep habarlaidy "Ult aqparat".
Onyń aitýynsha, biyl sanaqty ótkizý úshin sharttyq negizde aýdan, ýchaske boiynsha ýákilder, nusqaýshy-baqylaýshylar, tirkeýshiler men interviýerler retinde 3412 adam qatysady.
Halyq sanaǵynyń daiyndyq kezeńine 1-30 maýsym aralyǵynda Almaty qalasy boiynsha 48 nusqaýshy-baqylaýshy men 618 tirkeýshi qatysady.
Interviýerler adamdardyń mekenjaiy men sanyn naqtylaý úshin barlyq turǵyn jáne turǵyn emes úi-jailardy aralaidy.
«Interviýerde tiisti mórmen rastalǵan kýálik, ainalyp ótýge jatatyn obektilerdiń tizimi bar mobildi qosymshasy bar planshet, sondai-aq 2021 jylǵy Ulttyq sanaqtyń simvoly bar kók tústi bókebai pen portfel bolady. Interviýer týraly qosymsha aqparatty sanaq.gov.kz saitynan bilýge bolady. Onda respýblika boiynsha interviýerdiń tegi, aty, ákesiniń aty men onyń kýáliginiń nómiri kórsetilgen tizim jariialanady», – dedi Aidar Ábildabekov.
1 qyrkúiekten 15 qazanǵa deiingi sanaqta negizgi ekpin mamandandyrylǵan internet-resýrstar arqyly sanaqtyń onlain rejimde ótýine bailanysty sanaq.gov.kz,e-gov.kz táýlik boiy qoljetimdi bolady.
Osylaisha sanaq barlyǵyna yńǵaily bolady.
Bul degenimiz – qala turǵyndary qai jerde ornalasqanyna qaramastan, ózderine jáne otbasy múshelerine sanaq paraqtaryn toltyra otyryp, protsedýradan óz betinshe óte alady.
Sonymen qatar, óz betinshe ótken árbir adam telefonǵa SMS-habarlama alady, bul onyń sanaqqa qatysýyn rastaidy.
Dástúrli jappai aralaý 1-30 qazan aralyǵynda sanitarlyq normalardy saqtai otyryp, onlain-rejimde sanaqtan ótpegen respondentter arasynda ótkiziletin bolady.
«Sanaqshylar úilerdi aralaidy, olardyń árqaisysynda derekterdi jinaý men óńdeýdi tezdetetin elektrondy planshet bolady. Bul adam faktorynyń derekter sapasyna áserin azaitýǵa, JSN qoldaný arqyly anyqtyq deńgeiin arttyrýǵa jáne aqparattyń qaitalanýyn boldyrmaýǵa múmkindik beredi», - dep naqtylady departament basshysy.
Planshetterge mobildi qosymshalar júkteledi, onyń kómegimen interviýer jikteýishter men anyqtamalyqtardy qoldana otyryp, salynǵan barlyq arifmetikalyq-logikalyq baqylaýlardy eskerip, saýalnama júrgizedi.
Alynǵan málimetter tikelei jalpy málimetter bazasyna jiberiledi. Derekter zańnama talaptaryna sai qupiia bolady.
