Almatydaǵy Jastar resýrstyq ortalyqtary eriktileriniń qatysýymen metroda, SOO-da, Medeý, Shymbulaq pen sport alańdarynda gimn oryndaldy, dep habarlaidy QazAqparat.
«Biz metro stantsiiasyna jinalyp, ánurannyń alǵashqy áýenin oinaǵanda, jolaýshylar bizge jaqyndai bastady, bireý jai án aitsa, bireý uialy smartfondardyń kamerasyna túsirdi. Osyndai is-shara árqaisynyń nazaryn aýdardy, bizden surai bastady, biz búgin Memlekettik rámizder kúni ekenin aittyq. Bul Qazaqstan halqy úshin erekshe mereke, óitkeni kez kelgen memlekettiń órkendeýi memlekettik rámizderge degen qurmetten bastalady», - dedi volonter Aibek Melsov.
Osy kezde Bostandyq aýdanynyń jastar resýrstyq ortalyǵynyń eriktileri fýdkorttyń janynda ornalasqan «Mega Tsentr» SOO-ǵa jinaldy.
Uiymdastyrýshylardyń aitýynsha, aktsiiaǵa Almaty qalasynyń 40-qa jýyq jas qatysty.
«Bul oryn kezdeisoq tańdalmaǵan. Munda kún saiyn qala jastary keledi, bul aktsiia olardyń patriottyq tárbiesine arnaldy. Meniń oiymsha, biz óz maqsatymyzǵa jettik. Bul aktsiia bir de bir kelýshini beijai qaldyrmady», - dedi Ádil Nurpeiisov.
Túrksib aýdanynyń jastar resýrstyq ortalyǵynyń belsendisi Arnai Sahymbetov keremet kóńil-kúi syilady. Ol 70 erikti qatarynda Saýranbaev-Spartak kósheleriniń qiylysynda QR Ánuranyn oryndady.
«Barlyǵy erekshe sezimde boldy, bizge áskeri orkestr súiemeldendi, árqaisymyz Tý, Ánuran, Eltańbany maqtan etemiz. Biz memlekettik rámizderimizdiń bar ekenin baǵalaýymyz kerek», - dedi Arnai Sahymbetov.
Sonymen qatar, ánuran barlyq skverlerde, jaiaý júrginshiler kóshelerinde, metroda, «Medeý» kesheni men «Shymbulaq» kýrortynyń aýmaǵynda, sondai-aq «Kók Tóbe» saiabaǵynda shyrqaldy.
