Almatyǵa 26 million teńgege sheteldik blogerler shaqyrylady. Bul týraly qalalyq týrizm basqarmasy málim etti, dep habarlaidy "Ult aqparat".
Maqsat - qalanyń halyqaralyq jáne ishki naryqtardaǵy brendterin álemge tanytý.
Baspasóz-týry eki kezeńge bólingen. Bireýi biyl 2/3 toqsanda, ekinshisi 3/4 toqsanda ótkiziledi. Ár kezeńde Grýziia, Armeniia, Belarýs, Resei, Ýkraina, Túrkiia, Koreia, BAÁ jáne Gonkongten 20 bloger shaqyrylady. Bul elderdi tańdaý Almatyǵa tikelei reisterdiń jáne jańa saiahat oryndaryn izdeitin jáne tólem qabileti bar aýditoriiaǵa bailanysty.
Baǵdarlama aiasynda sheteldik blogerler Qazaqstannyń tarihy men mádenietinen syr shertetin jerlerdi aralaidy.
«Atalǵan soma týristik nysandardy aralaýǵa, viza rásimdeýge, tamaqtaný, meditsinalyq kómek, barý-qaitý ekonom-klass áýe bileti, orys jáne aǵylshyn tilderinde gid-aýdarmashyǵa jumsalady. Sondai-aq blogerler úshin qazaqtyń ulttyq taǵamdaryn ázirleý boiynsha sheberlik synyby jáne ulttyq kiimdegi fotosessiiamen qolónershiler sheberhanasyna barý uiymdastyrylady. Qazaqstanǵa kelgen qonaqtarǵa ulttyq kádesyilar usynylady. Baspasóz -týry Almatydaǵy epidemiologiialyq jaǵdaidy eskere otyryp ótkiziledi», - dep atap ótti basqarmadaǵylar.
