Almaty zoobaǵyna kelýshiler ondaǵy janýarlardy 6 maýsymnan bastap kóre alady, dep habarlaidy QazAqparat.
«Eki jarym ai boiy Almaty zoobaǵy jabyq bolatyn. Zoobaq qyzmetkerleri janýarlardy ekstremaldy rejimde qorektendirip, tazalap jumys istedi. Sondai-aq, karantin janýarlar tóldeitin ýaqytqa tuspa-tus keldi. Tek osy aralyqtyń ózinde 70-ke jýyq balapan shyqty», - dedi Almaty zoobaǵynyń direktory Seiilhan Aqylbekov.
Ásirese, 8 jyldan beri urpaq órbitpegen qozyqumai qusy biyl balapan shyǵardy.
Aita ketý kerek, álemde tuńǵysh ret 1972 jyly Almaty zoobaǵynda qozyqumaidan balapan shyqqan.
Belgisiz sebepterge bailanysty bul qus 8 jyldan beri balapan órbitpegen.
«Biyl aqpannyń sońynda eki balapan shyqty. Tuiaqtylar bóliminde 3 bóken, teńbil buǵy, túie, poni, karlik qoilar tóldedi. Almaty zoobaǵy tarihynda birinshi ret harza týdy. Biz 3 kúshik týdy dep tuspaldap otyrmyz. Qazir ázirge kórsetpeidi. Keiinirek olardy tamashalaityn bolamyz», - dedi zoobaq direktory.
Byltyr týǵan Avstraliia esimdi qabylannyń kúshigi de ósip qaldy. Djim esimdi gibbon da 1 jasqa keldi.
Bul ǵajaiyptardyń barlyǵyn 6 maýsymda tamashalaýǵa bolady. Sebebi, zoobaq 2 ai úzilisten soń ashylady.
Zoobaqqa kireberiste dezinfektsiialyq dáliz ornatylǵan. Antiseptikter, sanitaizerler bar.
