Almatyda sýǵa túsýge tyiym salynǵan oryndar dron kómegimen baqylanýǵa alyndy, dep habarlaidy "Ult aqparat" Tótenshe jaǵdailar departamentiniń baspasóz qyzmetine silteme jasap.
Qurylǵynyń ereksheligi - ol áýe arqyly baqylap qana qoimai, sonymen qatar Sairan kóliniń ruqsat etilmegen jerlerinde shomylyp júrgenderdi daýys zoraitqysh júiesi arqyly eskertedi.
«Buǵan deiin Sairan kólinde patrýldeýdi 109 qutqarý qyzmetiniń qutqarýshylary eki marshrýt boiynsha qaiyqpen júrgizetin. Onyń jiiligi ár 20 minýt saiyn, 40 minýttyq ýaqytpen júzege asyryldy. Bul ádis aitarlyqtai ýaqyt alatyn. Endi sýǵa túsýge tyiym salynǵan jerlerdi dron kómegimen baqylaýǵa aldyq», - dep jazdy áleýmettik jelide qalalyq TJD baspasóz qyzmeti.
Sýǵa shomylý maýsymy bastalǵaly beri Tótenshe jaǵdailar departamenti, politsiia basqarmasy, respýblikalyq jedel- qutqarý jasaǵy men 109 qutqarý qyzmeti, QR UQ 5571 áskeri bólimi jáne eriktiler 300-den astam birlesken reid ótkizdi. Shara barysynda 4,5 myńnan astam adamǵa únparaq taratyldy. Sonymen qatar, Qazaqstan Respýblikasy Ákimshilik kodeksiniń 440-baby («alkogoldik ishimdikterdi ishý nemese mas kúiinde qoǵamdyq oryndarda kóriný») boiynsha 19 adam 270 myń teńgege ákimshilik jaýapqa tartyldy.
Aita keteiik, jyl basynan beri Sairan kólinde eki adam sýǵa batyp, alty adam qutqaryldy.
