Foto: Almaty Politsiia departamenti
Almaty qalasynyń politsiia departamenti kóshedegi zańsyz kólik jarystary men qaýipti júrgizýdiń aldyn alý úshin qalada jappai reid júrgizilip jatqanyn málimdedi, dep habarlaidy Ult.kz.
Politsiia deregine sáikes, nebári úsh táýliktiń ishinde 5 myńnan astam jol qozǵalysy erejesin buzý faktisi anyqtalǵan. Mas kúiinde kólik basqarǵan 43 júrgizýshi ustalyp, barlyǵy kólik júrgizý quqyǵynan aiyryldy. Sonymen qatar 369 adamnyń kólikti tiisti qujattarsyz basqarǵany belgili boldy. Onyń ishinde 94 avtokólik arnaiy aiyp turaǵyna qoiylǵan.
Politsiia qyzmetkerleri qaýipti júrgizý, sonyń ishinde túngi kóshe jarystaryn uiymdastyrý derekterin de anyqtaǵan. Jyldamdyqty shamadan tys arttyrýdyń 2 myńnan astam faktisi tirkelgen.
– Keibir júrgizýshiler quqyq buzýshylyqtaryn ádeii beinejazbaǵa túsirip, áleýmettik jelilerge jariialaidy. Alaida mundai árbir derek baqylaýda, quqyq buzýshylar anyqtalyp, zań aiasynda jaýapqa tartylady, – dep málimdedi politsiia departamenti.
Tártip saqshylary mundai jaǵdailardyń biri ál-Farabi dańǵylynda bolǵanyn atap ótti. Júrgizýshi kóligin saǵatyna 250 shaqyrym jyldamdyqqa deiin údetken. Ol jedel túrde ustalyp, sot sheshimimen 10 táýlikke ákimshilik qamaýǵa alyndy.
