Foto:depositphotos.com
Almatynyń Túrksib aýdanyndaǵy gaz qubyry qalpyna keltirildi, al politsiia tergeýdi bastady, - dep habarlaidy Ult.kz Tengrinews.kzke silteme jasap.
Almatynyń Túrksib aýdanyndaǵy káriz qubyrlaryn óz betinshe tóseý barysynda búlingen ortasha qysymdy jerasty gaz qubyry qalpyna keltirildi. Ol "Ý Asimy" mekemesine káriz qubyrlaryn óz betinshe tartý barysynda zaqymdanǵan.
"Jeke tulǵalar qalalyq qyzmetterdiń kelisiminsiz túnde asfaltty tesip, gaz qubyryn zaqymdaǵan. Jaýapsyz áreketterdiń saldarynan birneshe qazandyqtyń jumysy toqtatyldy. Jóndeý-qalpyna keltirý jumystaryna QazaqGaz Aimaq AQ-nyń 150 jumysshysy men 6 tehnikasy jumyldyryldy. Tutynýshylardyń bir bóligin úzdiksiz jylýmen qamtamasyz etý maqsatynda "ATKE" JShS-niń "Áýejai" qazandyǵy májbúrli túrde rezervtik otyn mazýtqa aýystyryldy", - dep jazylǵan ákimdik habarlamasynda.
Saǵat 14:00-degi jaǵdai boiynsha gaz qubyryndaǵy aqaý joiyldy. Mamandar júiege qysym synaǵyn júrgizedi, sodan keiin tutynýshylardyń qaýipsizdigin qamtamasyz etý maqsatynda árbir úige baryp, gazdy birtindep qosady.
"Turǵyndardy qaýipsizdik tehnikasyn saqtaýǵa jáne gazdy ózdiginen qospaýǵa shaqyramyz", - dedi ákimdik ókilderi.
Almatynyń qala qurylysy baqylaý basqarmasy bul derek boiynsha jospardan tys tekseris jumystaryn bastady. Nátijesinde ákimshilik sharalar qabyldanyp, zańbuzýshylyqtardy joiý týraly nusqama beriledi.
Sonymen qatar, oqiǵanyń saldaryn joiýǵa ketken barlyq shyǵyn kináli tulǵaǵa júkteledi.
Aita keteiik, buǵan deiin Túrksib aýdanynda turatyn almatylyqtar túnnen beri gaz joq ekenin aitqan edi. Olardyń sózinshe, kóp úi jylýsyz qalǵan.
Keiinirek QazaqGaz Aimaq AQ 16 qańtarda káriz qubyrlaryn tóseý úshin júrgizilgen jumystar kezinde ortasha qysymdy jerasty gaz qubyrynyń ýchaskesi zaqymdalǵanyn habarlady. Qaýipsizdikti qamtamasyz etý maqsatynda almatylyqtardan gaz krandaryn jabýdy jáne jumystar aiaqtalǵanǵa deiin krandardy ashpaý suraldy.
