Almatyda oryn alǵan atys oqiǵada jaralanyp, aýrýhanada kóz jumǵan politsei Meirambek Rahmatýllaevty týystary aqtyq saparǵa shyǵaryp saldy. Jerleý rásimi quqyq qorǵaý qyzmetkeriniń týǵan jeri Ońtústik Qazaqstan oblysy, Qazyǵurt aýdany, Qarabastaý aýylynda ótti, dep habarlaidy NUR.KZ tilshisi.
Shilde aiynyń 18-inde Almaty qalasynda oryn alǵan sumdyq oqiǵa barysynda qarýlanǵan buzaqy 8 adamdy jaralyp, 8 adamnyń ómirin qidy. Sonyń biri - ońtústikqazaqstandyq politsiia leitenanty Meirambek Nuridillauly Rahmatýllaev.
Ol qandy oqiǵa oryn alǵan kúni ishki ister bóliminde kezekshilikte bolǵan. Basa kóktep kirgen azamatty zań boiynsha kirýge bolmaityndyǵyn eskertip, jolyn bógegeni úshin buzaqy qaltasynan qoldan jasaǵan sýyq qarýymen ony atyp salǵan. Sóitip politseidiń «Kalashnikov» avtomatyn alyp, syrtqa qarai qashyp ketedi.
Basynan jaralanǵan Meirambek aýrýhanaǵa tústi. Eki aptadai aýrýhanaǵa jatqan politsei esin jimastan ómirden ótti.
Politseidi búgin barsha týys-tanystary, áriptesteri aqtyq saparǵa shyǵaryp saldy. Jerleý rásimine Ońtústik Qazaqstan oblysy men Almaty qalasy ákimdiginiń ókilderi de qatysty.
Jas politseidiń synyptastary da dostarynyń endi aralaryna joq ekenine senbeidi.
«Meirambekpen on bir jyl bir synypta oqydym. Bir partada otyrdym. Bala kúninen óte meiirimdi, ainalasyna óte qamqor boldy. Bul habardy estigenimizde tóbemizden jai túskendei kúi keshtik. Dosymyz endi joq degenge sene alar emespiz. Quddy bir qorqynyshty tús sekildi», - dep kúrsindi marqumnyń synyptasy Dosbol Sadybaev.
Marqumnyń ákesi Nurdildá Tanaǵulov ulynan bir sátte aiyrylyp qalǵanyna áli sene alar emes.
«Balam óte meiirimdi edi. Bul salaǵa óz qalaýymen bardy. Biyl ǵana qolyna diplomyn alyp, elge qyzmet etemin dep jumysqa ornalasty. Jaqynda úilendirip edim. Bul qaiǵy janyma óte aýyr tidi», - dedi Meirambek Rahmatýllaevtyń ákesi.
Meirambek Rahmatýllaev 1992 jyly dúniege kelgen. Qarabastaý jalpy orta mektebin 2009 jyly bitirgen. Qazaqstan Respýblikasy Ishki Ister ministrliginiń Bókenbaev atyndaǵy Aqtóbe zań institýtynyń túlegi. Mamandyǵy - zańger.
Eńbek jolyn Almaty qalasy Almalyq aýdandyq ishki ister bóliminde ýchaskelik inspektor bolyp bastaǵan. Úidiń ortanshy perzenti. Artynan bir ápkesi men inisi jáne de aiaǵy aýyr jary Áigerim qaldy.
Aita keteiik, jas tártip saqshysynyń shańyraq kótergenine kóp ýaqyt óte qoimaǵan. Shildeniń 10-nynda qolyna qusyn qondyrǵan ol 13-i kúni qaita jumysyna kirisedi. Bir aptadan soń qaskóidiń qolynan jaraqat alyp, baqilyq boldy.
Bilik tarapy qandy oqiǵada qaza bolǵan politseidiń otbasyna materialdyq turǵyda, atap aitqanda, Almaty qalasy ákimdigi 15 mln, OQO ákimdigi 5 mln teńge kóleminde kómek berdi. Sonymen qatar respýblikadaǵy ishki ister organdarynyń barlyq qyzmetkerleri qandy oqiǵada qaza tapqan jáne jaralanǵandar men olardyń otbasylaryna kómek retinde bir kúndik jalaqalaryn aýdardy.
Aita keterligi, Meirambek Rahmatýllaev qyzmet kezinde qaskóidiń qolynan qaza tapqan qazyǵurttyq ekinshi politsei. Osydan tórt jyl buryn Almaty qalasynda qandy oqiǵa oryn alyp, saldarynan dál osy aýyldan shyqqan taǵy bir politsei qylmyskerdiń qolynan qaza tapqan eken.
