Almatydaǵy 3 jolairyq qurylysy qashan aiaqtalady?

Almaty ákimi Baqytjan Saǵyntaev megapolistegi úsh jol airyǵynyń qurylys qarqynyn, metropolitenniń infraqurylymyn jáne Abai dańǵylyn qala shekarasyna deiin uzartý jumystaryn tekserdi, dep habarlaidy "Ult aqparat".

Qala ákimi Almatynyń «shyǵys qaqpasyndaǵy», Buqtyrma kóshesi men Qulja traktisiniń qiylysyndaǵy jolairyǵynda boldy. Qulja tas joly arqyly ótetin estakadanyń uzyndyǵy – 784 metr , Buqtyrma kóshesi boiyndaǵy týnneldiń uzyndyǵy – 570 metr. Jyl sońyna deiin jekelegen baǵyttar boiynsha kólik qozǵalysyn ashý josparda. 

Nysandy tolyq paidalanýǵa berý kelesi jylǵa kózdelgen. Bul Buqtyrma kóshesindegi kólik aǵynyn – 30%-ǵa, Qulja traktisinde ótkizý qabiletin 15%-ǵa arttyrýǵa múmkindik beredi.

Baqytjan Saǵyntaev Seifýllin dańǵyly men Jansúgirov kóshesiniń qiylysyndaǵy týnnel túrindegi jolairyqtyń jumys barysymen tanysty. Joba boiynsha Seifýllin dańǵyly boiymen kóliktiń kedergisiz qozǵalysy úshin jalpy uzyndyǵy 690 metr bolatyn eki týnnel salý qarastyrylǵan. Kólik quraldarynyń kóshede júrýi. Jansúgirov kóshesindegi, sondai aq ózge kólik qozǵalystary jer deńgeiinde ótedi. Tórt jer ústi jaiaý júrginshiler ótkelderin, trotýarlardy salý, aýmaqty abattandyrý jáne kógaldandyrý qarastyrylǵan.

Jobany 2022 jyly aiaqtaý josparlanǵan.

Qala ákimi Rysqulov dańǵyly men Emtsov kóshesi qiylysyndaǵy jolairyǵy qurylysynyń qarqynyn tekserdi. Estakadanyń uzyndyǵy 186 metr, Rysqulov dańǵylynda – 8 metr, al Emtsov kóshesiniń boiynda 4 jolaq qarastyrylǵan.

Budan basqa, Baqytjan Saǵyntaev árleý jumystary júrip jatqan Saryarqa jáne Dostyq beketterindegi metropolitenniń birinshi jelisiniń ekinshi kezeńiniń qurylys barysymen tanysty. Eki beketti tehnikalyq iske qosý jyl sońyna josparlanǵan.

Sondai-aq, Almaty ákimine Qalqaman beketindegi metropolitenniń birinshi jelisiniń ekinshi kezeńiniń úshinshi iske qosý keshenin salýdyń jumys barysy týraly baiandaldy. 

Jobada Dostyq beketinen Qalqaman beketine deiin uzyndyǵy 2,48 shaqyrym bolatyn Áshimov kóshesinen tómen salynatyn tonneldiń qurylysy qarastyrylǵan.

Jumys sapary kezinde Almaty ákimi Abai dańǵylyn Qalqaman shaǵyn aýdanyndaǵy Momyshuly kóshesinen Áýezov kóshesine deiin úńgileý jumysynyń barysyn tekserdi. 

Onyń jalpy uzyndyǵy 4,8 shaqyrym. «Shuǵyla» shaǵyn aýdanyndaǵy Iassaýi kóshesinen Bereke kóshesine deiingi ýchaskeniń uzyndyǵy 3 shaqyrym, mundaǵy jumystar aiaqtalyp qaldy. 

Joba boiynsha 6 jolaqty jol, trotýarlar, velojoldar salý qarastyrylǵan. Qurylys aimaǵynda ornalasqan ýchaskeler ýaqtyly satyp alynsa, onda jumysty aǵymdaǵy jyldyń sońyna deiin aiaqtaý josparlanýda. Osynyń arqasynda, Abai dańǵyly Momyshuly kóshesinen Naýryzbai aýdanynyń ákimshilik ortalyǵyna deiin uzaratyn bolady.

Baqytjan Saǵyntaev jolairyqtary men kóshelerdi uzartýdyń barlyq nysandary boiynsha jumys kúshi men tehnikany keńinen jumyldyrýdy, jumystyń sapasy men ýaqtyly atqarylýyn baqylaýdy tapsyrdy.

Budan ózge, tiisti vedomstvolardyń basshylary jobalardy iske asyrý kezinde týyndaityn máselelerdi jedel sheshýleri qajet.