Foto: videodan alynǵan kadr
Almatyda Shuǵyla aýdanynda pyshaq jaraqytynan kóz jumǵan Áli Seriktiń synyptasy qylmysqa qatysy bar degen kúdikpen ustaldy, dep habarlaidy Ult.kz KTK arnasyna silteme jasap.
Qazaqstandyq tai boksynan álem chempiony Áli Seriktiń 11 jyl birge oqyǵan synyptasy adam óltirdi degen kúdikpen ustaldy.
“Júrek tusynan urǵan. Tórt ret. Moiynnan urǵan. Qolynda eki bolǵan ǵoi. Qol qoldap ekeýimen urǵan ǵoi. Ekeýi negizi bir mektepte, bir synypta oqyǵan. Osy úide aýyzasharda bolyp, oraza kezinde aýyz ashyp, kómektesip júrgen bala edi. Álimen birge qar kúrep júretin”, – deidi Álidiń anasy Aqmaral Tabysbekqyzy.
Marqumnyń bapkeri Álidiń keler jyly eresekter arasynda ótetin Qazaqstan chempionatynda qatysýy kerek edi deidi.
“Áli eń jas álem chempiony bolǵan. Biz odan úlken úmit kúttik. Ol árqashan ózinen keiingi jastarǵa úlgi bolatyn. Keler jyly eresekter arasynda Qazaqstan chempionaty ótýi kerek edi. Áli sol dodany jeńip, Aziia chempionatynda baq synaǵysy kelgen. Túbinde kásipqoi sportqa túbegeili ótýdi josparlaǵan edi”, – deidi bapker Ramis Ǵabitov.
Áli Serikti pyshaqtady degen kúdikti birden quryqtalyp, qamaýǵa alyndy.
“Osy adam óltirý dereginiń sebebin “aramyzda týyndaǵan kikiljiń, janjaldyń saldarynan pyshaq jaraqatyn saldym” dep túsinikteme berdi. Qylmystyq is júrgizý kodeksiniń 128-babynyń normalary boiynsha bul azamat qamaýǵa alyndy. Qylmystyń basqa da mán-jaiy anyqtalyp jatyr”, – dedi Almaty qalasy politsiia departamentiniń resmi ókili Saltanat Ázirbek.
Álidiń denesi jaqyndaryna tabystaldy. Olar tergeýdiń ádil júrip, kúdiktige qatań jaza taǵaiyndalýyn talap etip otyr.
Jantúrshigerlik jaǵdaidy óz kózimen kórgender kóp. Kýágerlerdiń biri Álidiń kóz aldynda jan tapsyrǵanyn aitty.
“Qansyrap júgirip osy jerge qulady. Eki jigit qashty. Artynan bir bala qýdy. Taba almadyq dep, eki jigit keldi. Kádimgidei tiri jatqan. Kóz aldymda óldi”, – deidi Serik Raqyshev.
