Almatyda jol apatyna kináli mas júrgizýshi tóbeles shyǵardy. Qalalyq politsiia departamenti oqiǵanyń mán-jaiyn túsindirdi, dep habarlaidy "Ult aqparat".
Jol apatyna ushyraǵan júrgizýshilerdiń tóbelesi áleýmettik jelide tarady.
Kadrlardan birneshe er adamnyń jol apatynan keiin sózge kelip qalǵanyn kórýge bolady, al kýágerler olardy arashalap júr.
«Almaty-Arasan shatqalyndaǵy jol apaty. «Mersedes» júrgizýshisi mas kúide jol jieginde turǵan eki kólikti qaǵyp ketti. Fýtbolkasyn sheship tastaǵan er adam tóbeles shyǵarmaq boldy», - delingen video sipattamasynda.
Almaty Politsiia departamentiniń málimetinshe, jol apaty 5 shilde kúni shamamen keshki saǵat 17.00-de bolǵan.
«A. esimdi júrgizýshi jol qozǵalysy erejelerin, 2.4.2-bólimniń talaptaryn buza otyryp, mas kúide «Mercedes» markaly kóligin basqaryp, Kazachka kóshesimen soltústik baǵytta kele jatyp «Mercedes» avtokóligimen soqtyǵysty, odan ári «BMW» markaly kóligin qaqty.
Jol-kólik oqiǵasy saldarynan eki avtomobilge de zaqym keldi. Zardap shekkender joq. Materialdy Bostandyq aýdandyq politsiia basqarmasynyń qyzmetkerleri óndiriske aldy», - dedi Almaty qalasy PD anyqtaý basqarmasynyń basshysy Oljas Sháripov.
