Prokýratýra balalardy satý týraly habarlandyrýlar ornalastyrylǵan sheteldik internet saityn anyqtady, dep habarlaidy "Ult aqparat" Almaty qalasynyń prokýratýrasyna silteme jasap.
Ondaǵy málimetterge qaraǵanda, jańa týǵan balalarynan bas tartqysy keletin jas áielder olardy zańmen belgilengen tártipti buza otyryp, ýákiletti organdar men sottyń tiisti sheshiminsiz «satyp alýdy» usynady.
Sonymen qatar saitta balalardy osylai asyrap alǵysy keletin adamdardyń habarlandyrýlary da bar.
«QR «Neke (erli-zaiyptylyq) jáne otbasy týraly» Kodeksiniń 196-babyna sáikes taýyp alynǵan, tastandy (bas tartylǵan) bala ishki ister organdarynyń, qorǵanshylyq nemese qamqorshylyq jónindegi fýnktsiialardy júzege asyratyn organnyń, bilim berý uiymdary ákimshiliginiń nemese bala ornalastyrylǵan meditsinalyq uiymnyń ótinishi boiynsha taýyp alynǵan, bas tartylǵan nemese qaldyrylǵan kúnnen bastap jeti táýlikten keshiktirilmei tirkelýge tiis.
«Buqaralyq aqparat quraldary týraly» Zańnyń 2-babynyń 4-tarmaǵyna sáikes qylmystyq jáne ákimshilik quqyq buzýshylyqtar jasaý maqsatynda buqaralyq aqparat quraldaryn paidalanýǵa tyiym salynady.
Osyǵan bailanysty Alataý aýdanynyń prokýrory sotqa saitty zańsyz dep taný jáne onyń Qazaqstan aýmaǵyndaǵy qyzmetin toqtatý týraly ótinishpen júgindi. Sot qadaǵalaý organynyń ótinishin qanaǵattandyrdy» - delingen habarlamada.
Materialdar QR QK-niń 128-babynda kózdelgen qylmysty jasaý, iaǵni adam saýdasy mánine tekserý júrgizý úshin quqyq qorǵaý organdaryna jiberildi. Atalǵan qylmystyq quqyq buzýshylyq úshin múlik tárkilenip, 15 jylǵa deiingi merzimge bas bostandyǵynan aiyrý túrindegi jaza kózdelgen.
