Almatyda úshem dúniege keldi, dep habarlaidy "Ult aqparat".
Almaty qalalyq qoǵamdyq densaýlyq saqtaý basqarmasynyń málimetinshe, 26 mamyr kúni Almaty qalalyq perinataldyq ortalyǵynyń dárigerleri 24 jastaǵy aiaǵy aýyr kelinshekti qabyldap, túski ýaqytta úshemdi bosandyryp aldy.
«Sábiler merziminen buryn 910 gramm, 930 gramm jáne 980 gramm bolyp shala týǵan. Degenmen dárigerler osy úsh qyzdyń ómirin saqtap qalý úshin qoldan kelgenniń bárin jasady. Dúniege kelgen úshem reanimatsiia bólimshesinde jatty. Reanimatsiiadan keiin qarqyndy terapiia bólimshesinde em aldy. Kútý kezeńi oń dinamikasyn kórsetken soń jańa týǵan nárestelerdiń jaǵdaiy turaqtalyp, jalpy bólimshege aýystyryldy. Qazirgi ýaqytta bosanǵan áieldiń jáne 3 qyzdyń jaǵdaiy qanaǵattanarlyq», - dep habarlady basqarmanyń baspasóz qyzmeti.
Jas ana men úshem 47 kúnnen keiin perinataldyq ortalyqtan úiine shyqty. Búldirshinderge Asylym, Aiaýlym jáne Sezim degen at qoiyldy.
Aldaǵy ýaqytta balalardy otbasynyń turǵylyqty jeri boiynsha emhana dárigerleri qadaǵalaidy.
Jas ana Aiym Saǵatbektiń aitýynsha, úshem ekenin alǵash bilgen kezde azdap qorqynysh bolǵan.
«Sábilerdiń jynysy mańyzdy bolmady. Bosanǵannan keiin sábilerdi birden reanimatsiiaǵa alyp ketti, dárigerler óte jaqsy qarady. Reanimatsiia bólimshesinen 10-15 kún aralyǵynda birinshi eki qyz shyqty, sodan keiin Sezimdi shyǵardy» - deidi ol.
«Jalpy qyzdardyń densaýlyǵy jaqsy, óz betimen eme alady, qazirgi tańda 930 gramm bolyp týǵan birinshi náresteniń salmaǵy - 1,9 keli. Ekinshisi 980 gramm bolǵan, qazir onyń salmaǵy - 2,9 keli. Úshinshi nárestemiz 910 gramm bolyp dúniege keldi, onyń salmaǵy 1,7 kelige jetti», – deidi qalalyq perinataldyq ortalyǵy bas dárigeriniń orynbasary Botagóz Arynova.
