Foto: Torgyn Nýrseitova/Vecher.kz
Almatyda “STOP buzýshylyq” atty aýqymdy jedel-profilaktikalyq operatsiia bastaldy. Bul joly qaladaǵy tártipti baqylaýǵa Qazaqstannyń ózge óńirlerinen de politsiia ekipajdary tartyldy, dep habarlaidy Ult.kz.
Ishki ister ministrliginiń málimetinshe, Almatyǵa Astana, Aqmola, Qaraǵandy jáne Jambyl oblystarynan qosymsha patrýldik kúshter jiberilgen. Negizgi maqsat – jol qaýipsizdigin kúsheitip, quqyq buzýshylyqtardyń aldyn alý.
Almaty qalalyq politsiia departamentiniń bastyǵy Aidyn Qabduldinov qyzmetkerlerge zańdylyq pen kásibilikti basty orynǵa qoiý kerektigin eskertti. Onyń sózinshe, árbir áreket ashyq ári zań aiasynda júrgizilýi tiis.
Bul jaǵdai áleýmettik jelilerde qyzý talqylandy. Qala turǵyndary joldarda ózge óńirlerdiń nómiri bar patrýldik kólikterdiń kóbeigenin baiqaǵan. Buǵan deiin messendjerlerde de Almatyda jappai reidter bastalatyny týraly aqparat taraǵan edi.
Ministrlik mundai tájiribe burynnan bar ekenin jáne ol eldegi jedel jaǵdaiǵa bailanysty júieli túrde qoldanylatynyn atap ótti. Qajet bolǵan jaǵdaida basqa óńirlerge de qosymsha kúshter jiberiledi.
Aita keteiik, bul sharalar Almatyda jýyrda bolǵan rezonansty jol apatynan keiin qolǵa alynyp otyr. 21 naýryzda ál-Farabi dańǵyly men Meńdikulov kóshesiniń qiylysynda eki kólik soqtyǵysyp, úsh adam qaza tapqan edi. Keiin belgili bolǵandai, ekinshi kóliktiń júrgizýshisi mas kúide bolǵan.
Sondai-aq, osy oqiǵadan keiin memlekettik nómirlerdiń zańsyz berilýi múmkin degen kúdikpen qylmystyq is qozǵalyp, birqatar laýazymdy tulǵalar qyzmetinen bosatyldy.
