Foto: nemolchi.uz
Almatyda azamattardy júieli túrde qýdalaý derekteri kóbeiip keledi. Qalada stalking boiynsha 11 qylmystyq is tirkelip, onyń altaýy sot qaraýyna joldanǵan. Bul málimet «STOP STALKING» forýmy barysynda jariia etildi, dep habarlaidy Ult.kz.
Jiynda Qazaqstan Respýblikasynyń Qylmystyq kodeksi 115/1-baby keńinen túsindirildi. Atalǵan bap azamatty óz erkinen tys qýdalaý, úreide ustaý, úiiniń mańyn ańdý, qaita-qaita bailanysqa shyǵýǵa tyrysý siiaqty áreketter úshin qylmystyq jaýapkershilik qarastyrady.
Zańǵa sáikes, quqyq buzýshy 50 táýlikke deiin qamaýǵa alynýy, 800 myń teńgege deiin aiyppul tóleýi nemese 200 saǵatqa deiin qoǵamdyq jumysqa tartylýy múmkin.
Mamandardyń aitýynsha, stalking áreketteri kóbine «mahabbat» nemese «sezim» degen jeleýmen jasalady. Alaida jábirlenýshiniń kelisiminsiz jasalǵan kez kelgen júieli áreket zań aldynda jaýapkershilikke ákeledi.
Almaty qalalyq politsiia departamenti Qoǵamdyq qaýipsizdik basqarmasy basshysynyń orynbasary Aitan Eleýsizov jábirlenýshimen onyń erkinsiz bailanys ornatý, sońynan ańdý, túrli áreketter arqyly mazalaý – stalkingke jatatynyn atap ótti. Onyń sózinshe, jábirlenýshilerdiń basym bóligi – áielder.
Al Profilaktikalyq jumysty úilestirý basqarmasynyń bólim bastyǵy Dáýren Mailyqbaev jeke keńistik máselesi qoǵamda áli de tolyq túsinilmei otyrǵanyn aitty. «Kópshilik muny sezimmen shatastyrady. Biraq zańda naqty jaýapkershilik kózdelgen», – dedi ol.
Mamandar azamattardy óz quqyqtaryn bilýge jáne qýdalaý faktileri týyndaǵan jaǵdaida dereý quqyq qorǵaý organdaryna júginýge shaqyrdy.
