Almaty qalasy «Otbasy bank» AQ filialy direktorynyń orynbasary Danagúl Túsipova onlain brifing barysynda tabysy tómen otbasylar úshin qalada turǵyn úi sertifikattaryn berý baǵdarlamasynyń iske asyrylýy týraly aityp berdi, dep habarlaidy QazAqparat.
Danagúl Túsipovanyń aitýynsha, turǵyn úi sertifikaty ipotekalyq nesie boiynsha bastapqy jarnanyń bir bóligin jabý úshin beriledi.
«Ony tabysy aiyna eń tómengi kúnkóris deńgeiiniń 3,1 eselik kórsetkishinen aspaityn ótinish berýshiler alady. 2021 jyly eń tómengi kúnkóris deńgeii 34 302 teńgeni quraidy. Áleýmettik kómek qaitarymsyz negizde kórsetiledi. Mysaly, otbasynda 6 adam turatyn bolsa, onda árbir otbasy múshesiniń tabysy 106 myń teńgeden aspaýy tiis», – dep túsindirdi «Otbasy bankiniń» ókili.
Sondai-aq spiker turǵyn úi sertifikatyn berý tártibi týraly aitty.
Máselen, turǵyn úidi bank klienti ákimdikte kezekte turǵan óńirde ǵana satyp ala alady. Turǵyn úi sertifikatyn alýǵa ótinimderdi qabyldaý Almatyda 2 shildeden bastalady. Ony birinshi kezekte ótinish bergen alǵashqy 2 myń adam alady.
«Almatyda «Shańyraq» baǵdarlamasy boiynsha kezekte turǵan 99 azamatqa tórt sanat boiynsha turǵyn úi sertifikatyn alý ruqsat etildi. «Baqytty otbasy» baǵdarlamasy boiynsha 183 sertifikat maquldandy. Aqsha kezekte turǵan adamnyń «Otbasy banktegi» shotyna aýdarylady», – dedi Danagúl Túsipova.
Aita keterligi, Qazaqstanda «Shańyraq» baǵdarlamasy turaqty túrde, al «Baqytty otbasy» baǵdarlamasy ýaqytsha jumys isteidi. Ony iske asyrýǵa respýblika boiynsha tek 70 mlrd teńge bólindi.
«Otbasy bankiniń» ókili turǵyn úi satyp alýǵa bastapqy jarnasy joq qazaqstandyqtarǵa óz bankterinde shottar ashýdy jáne bastapqy jarnaǵa azdap aqsha jinaqtaýdy usyndy. «Otbasy banktegi» jinaqtardyń artyqshylyǵyna memlekettik syiaqy, sondai-aq jeńildetilgen sharttar kiredi.
