ulysmedia.kz kollajy
Almatynyń tramplin keshenin salǵan qurylys kompaniiasynyń basshysy Ábdirazaq Baibolatov qalalyq prokýratýra ǵimaratynyń aldynda narazylyq aktsiiasyn ótkizdi. Ol 15 jyldan beri bereshegin ala almai júrginin aityp, qozǵalǵan qylmystyq istiń qaita ashylýyn talap etti. Biraq prokýratýra onyń shaǵymyn tyńdaǵannyń ornyna, «zańsyz miting ótkizdiń» dep politsiia shaqyrdy, dep habarlaidy Ulysmedia-ke silteme jasap Ult.kz.
Saǵyzsha sozylǵan is
19 aqpanda Almaty prokýratýrasy aldyna qaladaǵy tramplin keshenin salǵan «Tolqurylys» JShS direktory Ábdirazaq Baibolov pen «Sana TV» JShS basshysy Aleksandr Vedenko bardy. Olar 15 jyldan beri qurylysqa qatysty bereshegin ala almai júrgenderin aityp, narazylyq aktsiiasyn ótkizdi.
Ábdirazaq Baibolov uzaq jyldan beri qarjy daýyna bailanysty qylmystyq is «saǵyzsha sozylyp» kele jatqanyn aitty. Onyń sózinshe, qalalyq prokýratýra osy kúnge deiin mardymdy jaýap bermei keledi. Ol istiń «siyrquimyshaqtanyp» ketkenine senator Sultanbek Makejanovty aiyptai sóiledi. Baibolov «senator istiń júrýine kedergi jasap otyr» dedi. Makejanov taramplin salynǵan ýaqytta Almaty qalasynyń ákimi Baýyrjan Baibektiń orynbasary bolǵan.
«Biz qazir ne sebepti Almaty qalalyq prokýratýrasynyń aldyna kelip turmyz? Sebebi olar qylmystyq istiń júrýine kedergi keltirip otyr. Bizde birneshe ret halyqaralyq shańǵy tramplinine bailanysty ákimdik qyzmetkerleriniń ústinen qylmystyq is ashylǵan. Ol isterdiń joiylǵany týraly antikordan biz hat ta alǵanbyz. Osyden keiin, 2024 jyly jańadan qylmystyq is qozǵaǵan. Aýdittik dálelder, memlekettik aýdittik dáleler, politsiianyń tergeý departamentiniń dáleli bar degen. Antikorǵa berý úshin biz prokýror Karipbekovtyń qabylaýynda bolǵanbyz. Qylmystyq is ashý kerek degenbiz. Olar ashamyz dep ýáde bergen. «Saraptama qorytyndysyn kúteiik, sosyn qylmystyq is ashamyz» dedi. Almaty qalalyq prokýratýrasynyń ońtústik-shyǵys aimaǵynyń ótinishi boiynsha memlekettik saraptamaǵa teris sheshim berdi», – dedi ol.
Baibolov Jambyl oblysyna baryp, qaitadan saraptama jasatqan. Saraptama tramplin qurylysynan qarjy jymqyryldy degen qorytyndy shyǵaryp berdi deidi ol.
«Biz qarsy shyqqannan keiin, olar bizdi «qaitalap komissiialyq saraptama jasatyńdar» dedi. Olar Taldyqorǵanǵa jibermek boldy. Biraq biz oǵan da qarsy boldyq. Qostanaiǵa nemese Atyraýǵa jiberý kerektigin aittyq. Nege? Sebebi biz Almatynyń quqyq qorǵaý organdaryna senbeimiz. Olar barlyq qujattar bola tura teris sheshim shyǵardy. Osyǵan qaramastan, qorytyndy komissiialyq saraptamany Jambyl oblysynyń institýty jasady. Dál osyndai ońtústik-shyǵys aimaǵy boiynsha. Almaty qalasy jasaǵan saraptama negizinde jasaldy. Júz paiyz dálelder berdi. 1 milliard 700 million teńge qarjy eshqandai kelisimshartsyz, maqsatsyz jumsalǵanyn dáleldedi», – dedi Ábdirazaq Baibolov.
Ol «tergeý endi bul is azamattyq quqyqtyq qatynastar boiynsha sheshilýi tiis dep otyr» deidi. Ábdirazaq Baibolov bunymen kelispeidi.
«Bizdiń talabymyz – qylmystyq is qozǵalýy kerek. Ol senat depýtaty ma, basqa ma báribir», – dedi ol.
Ábdirazaq Baibolov narazylyq aktsiiasyn ótkizip jatqan ýaqytta qalalyq prokýratýra ǵimaratynan politsiia qyzmetkeri shyǵyp, oǵan eskertý jasady. Keiinnen ishten ózin tanystyrmaǵan er adam shyǵyp, ishke kirýdi surady. Baibolov prokýratýra ókilderin shaqyrýdy surady. Biraq qalalyq prokýratýra politsiia shaqyryp, «zańsyz minting ótkizdińiz» dep Baibolovtyń ózin kinálady. Ony Bostandyq aýdandyq politsiia bólimine alyp ketti.
Kezekshi prokýror ne dedi?
Ǵimarattyń kire berisinde turǵan kezekshi prokýror Álihan Turǵanqulov Ulysmedia tilshisine eshqandai pikir bere almaitynyn aitty.
«Ol isti men qadaǵalamaimyn. Ol is boiynsha eshqandai málimet bere almaimyn. Ol meniń quzyryma jatpaidy», – dedi ol.
Álihan Turǵanqulov prokýratýranyń laýazymdy ókilderi ne sebepti shyqpady? degen suraqqa:
«Estidi, aittyq, zvondadyq, habarladyq. Kúte turamyz. Men qaidan bilemin. Múmkin jinalysqa kirip ketken shyǵar. Múmkin basqa istermen ainalysyp jatqan shyǵar. Tez arada kelýge múmkinshilik joq. Sol sebepti kútemiz», – dedi kezekshi prokýror.
«Ábdirazaq Baibolovty politsiia alyp ketti. Endi olar kimniń aldyna shyǵady?» degen Ulysmedia tilshisiniń suraǵyna Álihan Turǵanqulov «Basqa jaýap bere almaimyn» dep qysqa qaiyrdy.
Issaparda júrgen senator
Ulysmedia senator Sultanbek Makejenovpen de sóilesýge tyrysty. Kómekshisi onyń qazir issaparda ekenin, telefonyn bere almaitynyn aitty. Sózinshe, senator issapardan tek 4-5 naýryzda keledi.
Kontekst
Almatydaǵy halyqaralyq shańǵymen sekirý tramplini 2010 jyly qyrkúiekte ashylǵan. Ol 2011 jyly ótken qysqy Aziia oiyndary úshin arnaiy salynǵan. Keshende bes tramplin, basseiin jáne iri sport ǵimaraty bar. Áýelde keshendi salýǵa sport komiteti tapsyrys bergen. Biraq ol keiin Almaty ákimdigine ótken. Tramplindi salǵan kompaniia qarajatty ýaqytynda almaǵandyqtan 2014 jyly qaryzdardyń kesirinen jumysy toqtap qalǵan. 2021 jyly Almaty qalasynyń eńbek inspektsiiasy isti sheshýge kompaniianyń statýsy kedergi degen. Olar «Tramplindi salǵan kompaniialar bankrot ta emes, jumys istep te turǵan joq. Eger olarda eki statýstyń biri bolsa, zań sheńberinde jumys ister edik» degen. Tramplin 20 milliard teńgeden astam qarjyǵa salynǵan.
