Foto: Qorǵanys ministrligi
Almatyda Keńes Odaǵynyń Batyry, Halyq qaharmany, táýelsiz Qazaqstannyń tuńǵysh qorǵanys ministri Saǵadat Nurmaǵambetovtiń 101 jyldyǵy atalyp ótti. Eske alý rásimi qolbasshy turǵan úide ornatylǵan eskertkish janynda ótti. Al Saǵadat Nurmaǵambetov atyndaǵy áskeri institýttyń alańynda kýrsanttar sap túzep, "101" sanyn jasady, dep habarlaidy qorǵanys ministrligi.
Saǵadat Nurmaǵambetov 1924 jyly 25 mamyrda qazirgi Aqmola oblysy Aqkól aýdany Qosym aýylynda týǵan.
1942 jyldyń shilde aiynda 18 jasta keńes ásker qataryna qabyldanyp, Túrikmenstanda pýlemetshiler daiyndaityn ýchilisheni úzdik aiaqtaidy. Keiin vzvod komandiri retinde maidan shebine attanady.
1945 jyldyń 27 aqpanynda 21 jasynda Saǵadat Nurmaǵambetovke Keńes odaǵynyń batyr ataǵy beriledi. 1945 jyldyń 31 mamyrynda Qyzyl tý ordenimen marapattalady. Qazaqtyń qaharman jigiti soǵysty Berlinde aiaqtady.
Ol 1946–1949 jyldar aralyǵynda Máskeýdegi Frýnze atyndaǵy Áskeri akademiiany bitirip, Orta Aziiadaǵy Túrkistan áskeri okrýgine polk basqarýǵa jiberildi. Keiin ártúrli shtabtyq, komandalyq laýazymdarda, onyń ishinde Qazaq KSR Azamattyq qorǵanys shtabynyń bastyǵy, Orta Aziia áskeri okrýgi qolbasshysynyń orynbasary, Ońtústik top áskerleri qolbasshysynyń birinshi orynbasary (Vengriia) qyzmetin atqardy.
1992 jyly Saǵadat Nurmaǵambetov Qazaqstannyń tuńǵysh qorǵanys ministri boldy.
1994 jyly Halyq Qaharmany ataǵy men №1 "Altyn Juldyz" tabys etildi.
1995 jyly armiia generaly ataǵymen otstavkaǵa shyǵyp, Qazaqstan prezidentiniń keńesshisi boldy.
2013 jyldyń 24 qyrkúieginde Saǵadat Nurmaǵambetov 90 jasqa qaraǵan shaǵynda ómirden ozdy.
