Foto: ashyq derekkóz
Qarjylyq monitoring agenttigi Almaty qalasy boiynsha departamenti «NBC TV» qarjy piramidasyn uiymdastyrý jáne oǵan basshylyq etý faktisi boiynsha tergeýdi aiaqtady, dep habarlaidy Ult.kz.
Tergeý málimetinshe, 2025 jyly kúdikti «www.nbcms.com» saity men WhatsApp messendjeri arqyly azamattardy tartyp, investitsiialyq joba retinde búrkemelengen qarjy piramidasyn qurǵan. Arnaiy chattarda 200-den astam adam bolǵan.
Qatysýshylarǵa qysqa beinerolikterdi qaraý arqyly tabys tabý usynylyp, jobaǵa kirý úshin 11 myńnan 160 myń teńgege deiingi investitsiialyq paketter satyp alý talap etilgen. Uiymdastyrýshylar táýligine 5–10 paiyzǵa deiin tabys (aiyna 150%-dan astam) ýáde etken. Alaida tólemder tek jańa qatysýshylardyń qarajaty esebinen júrgizilgen.
Sonymen qatar júiede referaldyq baǵdarlama engizilip, jańa adamdardy tartqandarǵa 10 paiyzǵa deiin syiaqy berilgen. Ekinshi jáne úshinshi deńgeidegi qatysýshylarǵa qosymsha bonýstar qarastyrylǵan.
Zańdy qyzmettiń kórinisin qalyptastyrý úshin uiymdastyrýshylar áleýmettik jelilerde jarnama jasap, jalǵan qujattar jariialaǵan, jasandy tabys kórsetkishterin kórsetip, blogerlerdi tartqan.
Tergeý barysynda qarajattar jeke tulǵalardyń shottaryna túsip, keiin P2P operatsiialary arqyly kriptovaliýtaǵa, sonyń ishinde Tether-ge aiyrbastalyp, anonimdi ámiiandarǵa jiberilgeni anyqtaldy.
Sot sanktsiiasymen 1 057 599 USDT kólemindegi kriptoaktivke tyiym salyndy. Bul shamamen 528,5 million teńgeni quraidy.
Kúdiktige qatysty elden shyqpaý týraly bultartpaý sharasy tańdalyp, qylmystyq is sotqa joldandy.
Agenttik azamattarǵa qarjy salmas buryn kompaniianyń resmi tirkelýin, quqyqtyq mártebesin jáne ruqsat qujattaryn tekserip, ýáde etilgen tabystyń shynaiylyǵyna muqiiat nazar aýdarýǵa keńes berdi.
