Jyl basynan beri Almaty turǵyndaryna kórsetilgen meditsinalyq kómek sapasyn baqylaý barysynda 10 myńnan astam qyzmettiń túrli kemshilikpen kórsetilgeni anyqtaldy. Nátijesinde qaladaǵy emdeý mekemelerine 889 mln teńge aiyppul salyndy. Bul týraly «Áleýmettik meditsinalyq saqtandyrý qory» KEAQ Almaty filialy málim etti, dep habarlaidy "Ult aqparat".
Meditsinalyq qyzmet sapasyn baqylaý bóliminiń jetekshisi Ásem Manapbaevanyń aitýynsha, kemshiliktiń basym bóligine konsýltativtik-diagnostikalyq kómek kórsetetin klinikalar tarapynan jol berilgen.
Jalpy, konsýltativtik-diagnostikalyq kómek boiynsha 8 myń qyzmet túrli kemshilikpen kórsetilgen. Nátijesinde 12,2 mln teńge qaitaryp alyndy.
Aqaýmen kórsetilgen 4,6 myń qyzmet – statsionarlar men statsionardy almastyratyn kómek uiymdaryna tiesili.
Kemshilikter úshin atalǵan klinikalar 870,1 mln teńge aiyppul tóledi. Al kemshilikterge jol bergen emhanalar Qorǵa 7,5 mln teńge qaitardy.
«Monitoring barysynda anyqtalǵan kemshilikterdiń deni emdeý-diagnostika barysynda belgilengen standarttardan aýytqý, meditsinalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa kelip saiady. Sonymen qatar, «kórsetildi» dep jazylǵan belgili bir qyzmet túrleriniń shyn máninde kórsetilgenin rastai almaǵan klinikalar da bar», – deidi Ásem Manapbaeva.
MSQ kórsetken qyzmet sapasyna turaqty baqylaý júrgizip otyrady.
Búginde dáriger kómegine júginbegen adamdy «qabyldaýda boldy» dep jazý máselesi jurtshylyq arasynda ózekti máselege ainalǵany belgili.
Biylǵy qańtar-mamyr ailary aralyǵynda filial mamandary azamattardan túsken aryz-shaǵymdar nátijesinde osyndai 71 faktini anyqtap, meditsina uiymdaryna 1,6 mln teńge aiyppul saldy.
Sonymen qatar statsionarlar men kúndizgi statsionar deńgeiinde «kórsetildi» dep tirkelgen 25 fakti boiynsha tiisti qyzmettiń kórsetilmegeni belgili boldy.
Nátijesinde 13,4 mln teńge qorǵa qaitaryldy. Qaitaryp alynǵan qarajat meditsinalyq kómektiń ózge túrlerine jumsalady.
