Almatyda kólikterden shyǵatyn shyǵaryndy kólemi 10 myń tonnaǵa azaidy. Bul týraly Baqytjan Saǵyntaev «Almaty» telarnasyndaǵy Akimat LIVE baǵdarlamasynyń tikelei efirinde málim etti, dep habarlaidy "Ult aqparat".
Ákimniń aitýynsha, ótken jyly shyǵaryndy azaidy - 122 myń tonna, bul 2019 jylmen salystyrǵanda 3 tonnaǵa az. Avtokólikten shyǵatyn shyǵaryndylar 10 myń tonnaǵa tómendedi. Al statsionarlyq kózderden shyǵatyndar kerisinshe 7 myń tonnaǵa ósti.
«Qaladaǵy jeke turǵyn úilerdi gazǵa kóshirý jalǵasýda. Almatynyń úileriniń 99%-y qazirdiń ózinde gazǵa qosylǵan. Ákimdik muqtaj otbasylardy qoldaý baǵdarlamasyn iske asyrýda. 2020 jyly 92 úi gazǵa tegin qosyldy», - deidi ákim.
Sonymen qatar, ol dizelmen jáne benzinmen júretin qoǵamdyq kólikti satyp alýǵa tyiym salý oń yqpal etkenin tilge tiek etti. Qoldanystaǵy barlyq kelisimsharttar tek gazben júretin avtobýstardy jetkizýge baǵyttalǵan.
«Qoǵamdyq kólik júiesinde 2441 avtobýs jumys isteidi, onyń ishinde 1715 avtobýs (75%) dizeldi otynmen júredi. 2020 jyly gazben júretin 150 avtobýs satyp alyndy. 2021 jyly gaz ben elektr energiiasyn paidalanatyn 500-ge jýyq qoǵamdyq kólik quraldaryn satyp alý josparlanýda», - dep atap ótti Baqytjan Saǵyntaev.
Shahar basshysy qalaǵa kire beriste kólikterdi toqtatatyn turaq jelisi qurylǵanyn aitty.
«Biyl qalaǵa kire beris jerlerge 19 ekologiialyq post ornatý jumystary júrgizilýde. Búginde 9 ekopost ashyldy, qalǵan 10 post aǵymdaǵy jyldyń kúzine deiin kezeń-kezeńimen ornatylady. Eki ailyq tekserýler qalalarǵa kiretin kólikterdiń 11%-y men 12,6%-y ekologiialyq normalarǵa sáikes kelmeitinin kórsetti. Kóktemde qalada júretin júk kólikteri ólshendi. Olardan shyǵatyn zalaldy zattardyń 29%-y normaǵa sáikes kelmeidi», - deidi ol.
Ákimniń aitýynsha, ómir súrýge jaily qalany qalyptastyrý úshin Almatyda jel rejimin zertteý bastaldy. Zertteý nátijeleri boiynsha jan-jaqty josparlaý jáne basqa da arhitektýralyq-qala qurylysy sheshimderiniń jospary ázirlenedi.
«Bul jumys matematikalyq esepteýler jáne naqtyly derekter arqyly búkil qala boiynsha, ákimshilik aýdandar men nysandardyń aýa aǵyndaryna taldaý jasaidy. Sondai-aq, bul qala mańyndaǵy jeldiń ekpinine jáne onyń qalanyń aýa sapasyna áserin baǵalaidy», - dep atap ótti Baqytjan Saǵyntaev.
Almatyda qala turǵyndaryn megapolistiń ártúrli bólikterindegi aýa sapasy týraly habardar etetin joba júzege asty.
Aqparat qalanyń 49 LED-ekranyndaǵy 41 datchikten, sondai-aq «Almaty» telearnasynan alynady. Derekter kúnine úsh ret jańartylady.
Ákim biyl aýany baqylaityn qosymsha 60 datchikti ornatý josparlanǵanyn málim etti. Barlyq derekter aqparatty jinaýǵa, taldaýǵa jáne óńdeýge arnalǵan GAJ júiesinde kórsetiledi. Osylaisha, qorshaǵan orta sapasynyń yqtimal boljamy úshin málimetter bazasy qurylady
«Budan ózge, AirVision qoǵamdyq qorymen jáne bastamashyl azamattarmen birge aýanyń lastanýynyń onlain-kartasyn qamtityn veb-portal jáne mobildi qosymsha ázirlenýde. AQI indeksi ǵalamdyq jelidegi aýanyń jaǵdaiyn salystyrý úshin ǵalamdyq ádisteme boiynsha esepteletin bolady», - dedi qala basshysy.
