Almaty qalasy ákiminiń janynan qalanyń kólik infraqurylymyn damytý jónindegi keńes quryldy, dep habarlaidy "Ult aqparat".
Baqytjan Saǵyntaevtyń tóraǵalyǵymen ótken keńestiń birinshi otyrysynda qoǵamdyq kólikterdiń jumysy, jol infraqurylymynyń qaýipsizdigi jáne velojolaqtardy uiymdastyrýdyń ózekti máseleleri talqylandy.
Megapolis basshysy keńestiń qalanyń kólik infraqurylymyn damytý jáne Vision Zero Almaty tujyrymdamasy aiasynda jol qaýipsizdigin qamtamasyz etýdiń ózekti máseleleri boiynsha naqtyly sheshimderdi talqylaý jáne qabyldaýdyń dialog alańyna ainalatynyn atap ótti.
Keńes quramyna osy salanyń sarapshylary, qoǵam belsendileri jáne kásiporyndardyń basshylary endi.
Keńes qalanyń kólik infraqurylymyn jetildirý boiynsha usynystar ázirleidi ári olardyń júzege asýyna monitoring júrgizedi jáne baǵa beredi, onyń ishinde kólik salasyndaǵy Memlekettik-jeke áriptestik jobalaryn baqylaidy, sondai-aq kólik salasynda týyndaǵan qoǵamdyq máseleler boiynsha konsýltativti kómek kórsetedi.
Baqytjan Saǵyntaev keńes músheleri árqaisysynyń jolaýshylar tasymalynyń sapasyn arttyrýǵa, jol qozǵalysyna qatysýshylardyń qaýipsizdigine jáne qalanyń kólik júiesin damytýdyń keshendi josparyn jetildirýge óz úlesterin qosatynyndaryna senim bildirdi.
Alǵashqy kezdesý barysynda jolaýshylar tasymalynyń sapasy, jol infraqurylymynyń qaýipsizdik standarttaryna sáikestigi, Almatynyń Bas josparyndaǵy kólik bóliminiń mártebesi týraly máseleler kóterildi.
Sátbaev kóshesi boiymen Shepetkov kóshesinen Manas kóshesine deiingi velosiped qozǵalysyn uiymdastyrý jobasy jeke qaraldy.
