Almaty politsiiasy jalǵan vaktsinatsiia tólqujatyn qandai meditsina mekemeleri jasaǵanyn aitty, dep habarlaidy "Ult aqparat" Polisia.kz resýrsyna silteme jasap.
Bul týraly tártip saqshylary «ZOOM» beineplatformasy arqyly ótken meditsinalyq mekemelerdiń arnaiy jinalysy kezinde habarlady.
– Turaqty negizde internet-resýrstarǵa jáne buqaralyq aqparat quraldaryna monitoring júrgizilýde, meditsinalyq anyqtamalardy qoldan jasaý faktilerin anyqtaý boiynsha jedel sharalar qabyldanýda. Eske salaiyq, jaqynda azamattardy Saýd Arabiiasy Koroldigine jiberý úshin 140-tan astam jalǵan vaktsinatsiia tólqujatyn jasaýmen ainalysqan týristik kompaniia anyqtaldy. Sonymen qatar, tergeý satysynda №21, №4, №16 jáne №13 qalalyq emhanalardyń jalpy tájiribe dárigerlerine qatysty qylmystyq ister qaralyp jatyr. Olar kirgen azamattarǵa vaktsinatsiiany salmai-aq, dozanyń birinshi komponentin qabyldaý týraly jalǵan derekterdi bazaǵa engizgen nemese vaktsinatsiia bólmesinde beinebaqylaý kamerasy bolsa, olar ekpeni alǵandai etip kórsetip ekpe salynǵan oryndy plastyrmen jabystyrǵan. Bul qyzmetterdiń barlyǵy aqshalai syiaqy úshin usynylǵandyǵy anyq, – deidi Almaty qalalyq politsiia departamenti bastyǵynyń birinshi orynbasary Nurlan Almasbekov.
Sonymen qatar, spiker jalǵan qujat jasaǵany úshin 4 jylǵa deiin bas bostandyǵynan aiyrý jazasy bar ekenin, al ony qoldanǵan adam 40 táýlikke qamaýǵa alynatynyn eske saldy.
Sondai-aq, joǵaryda atalǵan azamattardyń áreketinde «qyzmettik jalǵandyq» belgileri bar, iaǵni, jalǵan aqparatty resmi qujattarǵa engizý.
– Qurmetti meditsina qyzmetkerleri, ózińizdi qylmystyq iske tartýǵa jol bermeńiz jáne otbasyńyz ben jaqyndaryńyzdy osydan qorǵańyz, – dep qorytyndylady Almasbekov.
