Foto: cvetok24.kz
Almatyda gúl jetkizý qyzmetin atqarǵan er adamǵa qatysty is sotta qaralyp, ol «usaq buzaqylyq» baby boiynsha 7 táýlikke ákimshilik qamaýǵa alyndy. Bul týraly Ult.kz habarlady.
Jábirlenýshi ony jynystyq sipattaǵy áreketi úshin qylmystyq jaýapkershilikke tartýdy talap etkenmen, is ákimshilik is júrgizý tártibimen sheshilgen.
Almaty qalalyq soty men Politsiia departamentiniń málimetinshe, kúdikti ákimshilik jaýapkershilikke tartylǵan. Ákimshilik quqyqbuzýshylyq jónindegi mamandandyrylǵan aýdanaralyq sot onyń áreketin QR ÁQBtK-niń 434-baby («Usaq buzaqylyq») boiynsha saralap, 7 táýlikke qamaý jazasyn taǵaiyndady.
Oqiǵa 14 aqpanda bolǵan. Jábirlenýshiniń aitýynsha, kýrer shamamen saǵat 20:40-ta gúl jetkizgen. Tapsyrys aýyr bolǵandyqtan, ol gúl sebetin páter dálizindegi edenge qaldyrýyn suraǵan. Alaida kýrer úige kirgen soń gúldi qoiǵannan keiin onyń halatynan tartyp, ashyp jiberip, keýde tusyna qol tigizgen. Daria qatty shoshyp, er adamdy syrtqa qýyp shyǵyp, esikti áreń japqanyn aitqan.
Oqiǵadan soń ol kýrerge habarlama joldaǵan, alaida kýrer balaǵat sózder men «qolyńnan túk kelmeidi» degen mazmunda jaýap bergen.
Jábirlenýshi birden politsiia shaqyryp, aryz túsirgen. Keiin kýrerdiń inDrive servisi arqyly jumys istegeni anyqtalyp, kompaniia onyń akkaýnty buǵattalǵanyn málimdedi.
