Foto: ashyq derekkóz
Qarjy monitoringi agenttiginiń Almaty qalasy boiynsha departamenti «Eńbek resýrstaryn damytý ortalyǵy» AQ jáne «Birinshi kredittik biýro» JShS basshylyǵyna qatysty qylmystyq isti aiaqtady dep habarlaidy Ult.kz.
Tergeý málimetinshe, kúdiktilerge laýazymdyq ókilettikterdi teris paidalaný jáne para alý faktileri boiynsha aiyp taǵylǵan. «Eńbek resýrstaryn damytý ortalyǵy» – jeke tulǵalardyń tabystary týraly derekterdiń biryńǵai memlekettik operatory. Bul málimetter qarjy uiymdary úshin qaryz alýshylardyń tólem qabiletin baǵalaýda asa mańyzdy.
Anyqtalǵandai, 2020 jyly ortalyqtyń burynǵy basshysy men kredittik biýro jetekshisi zańsyz kelisimge kelip, nátijesinde jeke biýronyń tabysy 30%-dan 35%-ǵa deiin artqan. Osylaisha, memlekettik ortalyqtyń úlesi 70%-dan 65%-ǵa deiin tómendegen.
Sonymen qatar, tergeý barysynda aqparat almasý júiesine arnaiy servister engizilgeni belgili boldy. Ol jeke kredittik biýroǵa suranystardy jedel óńdeýge múmkindik berse, al memlekettik kredittik biýroǵa kerisinshe kedergi keltirgen.
Osynyń saldarynan memleketke 2 mlrd teńgeden astam zalal kelgen.
2025 jyldyń maýsymynda kúdiktilerdiń biri ortalyqtyń jańa basshysyna 75 myń AQSh dollary kóleminde para bergeni anyqtalǵan. Bul qarajat zańsyz tabys tabý shemasyn saqtap qalý maqsatynda usynylǵan.
Qazirgi tańda atalǵan tulǵalar ustaldy. Sot sanktsiiasymen olardyń 1 mlrd teńgeden asatyn múlki men baǵaly qaǵazdaryna tyiym salyndy.
Is materialdary taraptarǵa tanysý úshin joldandy. Qylmystyq-protsestik kodekske sáikes ózge málimetter jariia etilmeidi.
