Memleket basshysy stýdentterdi qajetti jataqhana oryndarymen qamtamasyz etýdi jáne turǵyn úi máseleleri sapaly bilim alýǵa kedergi keltirmeitin jaǵdai qalyptastyrýdy tapsyrdy. Osy tapsyrmany oryndaý aiasynda Qazaqstanda stýdenttik infraqurylym júieli túrde damyp keledi. Onyń ishinde ómirlik qiyn jaǵdaiǵa tap bolǵan stýdentterdi ýaqytsha ornalastyrý tetikteri de jetildirilýde, dep habarlaidy ult.kz.
Búgin ALT University-de kúrdeli jóndeýden ótken №1 Stýdentter úii ashyldy. Onyń bazasynda Qazaqstan Respýblikasy Ǵylym jáne joǵary bilim ministrligi men Almaty qalasy ákimdiginiń qoldaýymen Almaty stýdentterine arnalǵan daǵdarys ortalyǵy jumysyn jalǵastyrdy.
Is-sharaǵa QR Ǵylym jáne joǵary bilim ministrligi Joǵary jáne joǵary oqý ornynan keiingi bilim komiteti tóraǵasynyń orynbasary Aqerke Abylaihan, Almaty qalasy Jastar saiasaty basqarmasy basshysynyń orynbasary Miras Nysanaliev, ALT University Basqarma tóraǵasy – rektor Merýert Jarmaǵambetova jáne ýniversitet ókilderi qatysty.
Aqerke Abylaihan stýdentter úshin qolaily jaǵdai jasaý jastardy qoldaý men adami kapitaldy damytýdyń mańyzdy baǵyttarynyń biri ekenin atap ótti.
«Stýdentter úii birneshe jyl boiy jas adam úshin naǵyz úiine – alańsyz bilim alyp, damyp, bolashaqta elimizdiń órkendeýine qyzmet etetin bilim men daǵdylardy igere alatyn orynǵa ainalýy mańyzdy».
Kúrdeli jóndeýden keiin №1 Stýdentter úii 487 orynǵa eseptelgen. Jańartylǵan ǵimaratta stýdentterdiń turýyna, bilim alýyna jáne demalýyna qajetti jaǵdailar jasalǵan. Munda turǵyn jáne oqý keńistikteri, oqý zaly, jattyǵý zaly, meditsinalyq kabinet jáne qajetti turmystyq infraqurylym qarastyrylǵan.
Stýdentter úiiniń bazasynda jumys isteitin daǵdarys ortalyǵyna 50 oryn qarastyrylǵan. Ortalyq ALT University bazasynda tórtinshi jyl jumys isteidi jáne ýaqytsha turýǵa, sondai-aq áleýmettik, psihologiialyq nemese konsýltatsiialyq qoldaýǵa muqtaj stýdentterge kómek kórsetedi.
Ortalyqqa Almaty qalasyndaǵy joǵary oqý oryndarynyń stýdentteri oqý ornyna qaramastan júgine alady. Ýaqytsha ornalastyrý qajet bolǵan jaǵdaida Sitýatsiialyq ortalyq mamandary aldymen stýdenttiń óz ýniversitetiniń jataqhanasynan oryn berý múmkindigin anyqtaidy. Eger joǵary oqý orny oryn usyna almasa, bos oryn bolǵan jaǵdaida stýdent ALT University bazasyndaǵy daǵdarys ortalyǵyna ýaqytsha ornalastyrylady.
Bul tetik turaqty baspana máselesi sheshilgenge deiin stýdentterdi ýaqytsha turatyn orynmen qamtamasyz etýge jáne turǵyn úi máselesiniń oqý protsesine kedergi keltirmeýine múmkindik beredi.
Stýdenttik infraqurylymdy jáne ýaqytsha ornalastyrý tetikterin damytý – bilim alýshylar úshin qaýipsiz ári qolaily oqý jáne turý jaǵdailaryn jasaýǵa baǵyttalǵan júieli jumystyń bir bóligi.
