Foto: Almaty ákimdigi
Almatyda Naýryz merekesine orai alǵash ret ulttyq kiimmen muz aidynynda jappai syrǵanaý sharasy uiymdastyrylady, dep habarlaidy Ult.kz.
Qala turǵyndary men qonaqtaryna arnalǵan erekshe merekelik is-shara 18 naýryz kúni saǵat 16:00-den 20:00-ge deiin ótedi. Jappai syrǵanaý Almaty Arena, Halyq Arena jáne Olimpik muz arenasy alańdarynda bir mezette uiymdastyrylmaq.
Is-sharanyń basty ereksheligi – qatysýshylardyń ulttyq kiimmen kelýi. Uiymdastyrýshylar bul bastama arqyly qazaqtyń dástúrli mádenietin dáriptep, merekelik kóńil kúidi arttyrýdy kózdeidi.
Kelýshiler konkidi ózderimen birge alyp kelýge nemese muz aidyndarynda jalǵa ala alady.
Uiymdastyrýshylar almatylyqtardy bul keshti otbasy jáne dostarymen birge ótkizip, erekshe atmosferada Naýryz meiramyn qarsy alýǵa shaqyrdy.
