Foto: ashyq derekkóz
Almaty qalasynyń prokýratýrasy 800 mln teńgeden astam somaǵa biýdjet qarajatynyń negizsiz jumsalýyna jol bermedi, dep habarlaidy Ult.kz.
Qadaǵalaý barysynda Almaty qalasynyń prokýratýrasy jergilikti atqarýshy organnyń 0,5006 gektar jer ýchaskesin májbúrlep ielikten shyǵarý týraly sheshim qabyldaǵan kezde zań talaptaryn buzǵanyn anyqtaǵan.
Anyqtalǵandai, Almaty qalasynyń Bas josparyna sáikes atalǵan aýmaqta jalpy paidalanýdaǵy nysandardy salý qarastyrylmaǵan. Soǵan qaramastan, ákimdik zań talaptaryna qaishy keletin sheshim qabyldap, jerdi májbúrlep ielikten shyǵarý rásimin bastaǵan.
Baǵalaý nátijesi boiynsha, jer ýchaskesiniń quny 800 mln teńgeden asqan.
Prokýratýranyń narazylyǵy negizinde ákimdiktiń zańsyz qaýlysy kúshin joidy. Nátijesinde, biýdjet qarajatynyń negizsiz jumsalýyna jol berilmedi.
