Almatyda tozyǵy jetken 708 úi súriledi. Ortalyq kommýnikatsiialar qyzmetinde ótken baspasóz máslihatynda shahar basshysy Baqytjan Saǵyntaev osyndai málimet aitty, dep habarlaidy "Ult aqparat".
«Ózderińiz biletindei, Almatyda tozyǵy jetken baspana máseleleri bar. Sonymen birge, biz qala úshin tarihi biregeilikti saqtaý birinshi mindet ekenin nazarda ustaimyz. Sol sebepten, turǵyn úi qoryn jańartý baǵdarlamasyn qabyldadyq. Baǵdarlama boiynsha 708 apattyq úidi nemese 6 637 páterdi buzý, 34 605 páterge arnalǵan 683 úi salý kózdelgen», - dedi qala ákimi.
Onyń aitýynsha, baǵdarlama jóndeletin páter ieleriniń tolyq kelisimimen, menshik quqyǵyna kepildik bere otyryp júzege asyrylmaq.
Qala ákimdiginiń málimetine súiensek, jyl basynan beri baǵdarlama aiasynda 126 páterli 14 (Jetisý (8), Túrksib (2), Bostandyq (4) aýdandarynda) úi súrilgen.
