Foto: Depositphotos.com
25 aqpanda saǵat 11:00–de qalalyq tótenshe jaǵdailar qyzmeti «Kóktem-2026» respýblikalyq oqý-jattyǵýy aiasynda halyqty qulaqtandyrý júiesine tehnikalyq tekserý júrgizedi, dep habarlaidy Ult.kz.
Tekserý kezinde «Barlyǵyńyzdyń nazaryńyzǵa!» dabyl signaly boiynsha qala aýmaǵyndaǵy sirenalar az ýaqytqa qosylady. Sondai-aq synaq habarlamasyn taratý úshin tele jáne radioarnalardy ýaqytsha toqtatý júiesi iske qosylady.
Almaty tótenshe jaǵdailar departamenti turǵyndarǵa sabyr saqtaýdy eskertti.
— «Barlyǵyńyzdyń nazaryńyzǵa!» signaly — tótenshe jaǵdai qaýpi tóngen nemese týyndaǵan kezde shuǵyl aqparat taratar aldynda halyqtyń nazaryn aýdarý úshin beriletin eskertý belgisi, — delingen habarlamada.
Turǵyndar dybystyq signaldy estigen kezde teledidardy nemese radioqabyldaǵyshty qosýy, resmi internet-resýrstar men mobildi qoldanbalardaǵy aqparatpen tanysýy jáne usynylǵan nusqaýlarǵa muqiiat baǵynýy kerek.
