Erteńnen bastap Almatyda turǵyn úi sertifikattaryn alýǵa ótinim qabyldaý bastalady, dep habarlaidy QazAqparat.
Almaty ákimdigi qaitarymsyz turǵyn úi sertifikattaryn berýge 2 mlrd teńge bóldi. Bul týraly onlain brifing barysynda qalalyq Turǵyn úi saiasaty basqarmasynyń basshysy Daniiar Qyryqbaev málim etti.
Spikerdiń aitýynsha, bul soma 2 myń almatylyqtyń «Otbasy bankinen» jeńildetilgen ipoteka alý úshin bastapqy jarnanyń bir bóligin jabý úshin jetkilikti.
Sondai-aq, Daniiar Qyryqbaev turǵyn úi sertifikaty «Nurly jer» memlekettik baǵdarlamasy aiasynda «Shańyraq» jáne «Baqytty otbasy» baǵyttary boiynsha tegin ári qaitarymsyz negizde 1 mln teńge mólsherinde áleýmettik kómek túrinde beriletinin atap ótti.
«Sertifikattardy kezekte turǵan 1 men 2 toptaǵy múgedekter, múgedek balalary bar nemese olardy tárbielep otyrǵan otbasylar, jetim balalar men ata-anasynyń qamqorlyǵynsyz qalǵan balalar jáne kópbalaly otbasylar alady», – dedi Turǵyn úi saiasaty basqarmasynyń basshysy.
«Sertifikat alý úshin «Otbasy bankte» aldyn ala tólem qabilettilikten ótken azamattar belgilengen nysandaǵy qujattar men ótinishpen Almaty qalasynyń Turǵyn úi saiasaty basqarmasyna júginedi. Úsh jumys kúni ishinde qujattardyń durystyǵy men mártebeńizdiń sertifikat berý sharttaryna sáikestigi tekseriledi», – dedi ol.
Qajetti qujattar tizimi mynandai:
- nysan boiynsha ótinish;
- ótinish berýshi men otbasy músheleriniń jeke basyn kýálandyratyn qujat;
- sońǵy 6 aidaǵy tabysy týraly anyqtama;
- jumys ornynan anyqtama;
- Bankten turǵyn úi zaemyn berýdi maquldaǵan hat.
Turǵyn úi sertifikaty turǵyn úi zaemyn berýge maquldaý alǵan ári tabysy boiynsha talapqa sáikes keletin azamattarǵa beriledi: sońǵy jarty jyldaǵy tabysy otbasynyń árbir múshesine aiyna 106 336 teńgeden aspaýy tiis.
Turǵyn úi saiasaty basqarmasynyń basshysy ákimdiktiń turǵyn úi sertifikatynyń maquldanǵan somasyn «Otbasy banktegi» kezekte turǵandardyń jinaq shotyna aýdaratynyn aitty.
Bank soma túskennen keiin sertifikat iesimen qaryz shartyn nemese ipotekalyq shart jasaidy. Turǵyn úi sertifikatynyń somasyn aýdarýdyń maksimaldy ýaqyty maquldaý habarlamasyn alǵannan keiin 5 jumys kúndi quraidy.
Almatyda turǵyn úi sertifikattaryn alýǵa úmitkerler kóp.
Turǵyn úi saiasaty basqarmasynyń aitýynsha, búginde qalada 9 313 azamat baspanaǵa muqtaj. Olardyń ishinde 1 men 2 toptaǵy 2 758 múgedek, múgedek bala tárbielep otyrǵan otbasy sanatyna jatatyn 1 462 adam, 1 890 jetim jáne ata-anasynyń qamqorlyǵynsyz qalǵan balalar, 3 203 kópbalaly otbasy bar.
Turǵyn úi saiasaty basqarmasy turǵyn úi sertifikattaryn alǵysy keletin azamattarǵa konsýltatsiialyq kómek kórsetýge daiyn.
Qazirgi ýaqytta Almaty qalasynyń Turǵyn úi saiasaty basqarmasy Dostyq 85/Abai 1 mekenjaidaǵy áleýmettik qyzmetter úiinde ornalasqan.
