sýret: Almaty.tv
Almatyda jol apatynan qaza tapqan 18 jastaǵy Rasýl Tursynbaevtyń ata-anasy ádil tergeýdi talap etedi. Marqumnyń týystarynyń aitýynsha, jigit qadir túninde úige qaityp kele jatyp taksi salonynda túsiniksiz jaǵdaida qaitys bolǵan. Qaiǵy keship, qan jutqan ata-ana istiń mán-jaiy tolyq qarastyrylmaǵyn aitty. Bul týraly Almaty.tv siýjetinde aitylǵan, - dep habarlaidy Tengrinews.kz.
18-ge tolǵanyna 2 apta bolǵan Rasýl meshitten úiine qaitpaq nietpen taksi shaqyrady. Tún jarymynda beitanys eki jigitpen bir kólikte ketip bara jatyp, ol áleýmettik jelide tikelei efirge shyǵyp ta úlgergen. Qazir qolda bar sanaýly derektiń biri - osy. Beinede Rasýl otyrǵan kóliktiń jol ortasymen ketip bara jatqanyn anyq baiqaýǵa bolady. Al jiekte toqtap turǵan júk kóligine baryp soǵylǵandaryn rólde bolǵan jigit te, onyń dosy da "uiyqtap ketippiz" dep túsindirgen.
"Ekeýi - shofer men joldasy aman. Qolynda daq ta joq. Al meniń ulym kóliktiń artynda, qaýipsiz jerde otyrǵan. Beti de, basy da jaralanyp, denesiniń bári kógergen", – dedi Rasýl Tursynbaevtyń ákesi Murat Tursynbaev.
Apat tirkelgen ýaqyttan 1 saǵat ótkende Rasýl qaitys bolady. Sot-meditsinalyq saraptamaǵa súiensek, jigittiń miyna qan quiylǵan. Biraq eskerer taǵy bir jait, advokattyń aitýynsha, azamattyń denesiniń kei tusy kógergen. Al joǵaryda aitqan Rasýldyń sońǵy tikelei efirinde onyń eki júrgizýshimen sózge kelip qalǵany da taspalanǵan. Sondyqtan, ata-anasy apat aldynda balalardyń ózara tóbelesýi de múmkin dep otyr. Bul ázirge tek boljam ǵana.
"Áke-sheshesi kelip, keshirim surady. "Balamdy keshirińizshi, kómekteseiin" dedi. Men kerek emes dedim. Balamdy sońǵy saparǵa ózim attandyramyn", – deidi Murat Tursynbaev.
Al qorǵaýshy is áli de júrip jatqanyn, biraq kóp derek nazardan tys qalǵanyn aitty.
"Atalǵan ispen tanystym. Advokat retinde bul is aýyr qylmysqa jatady. Óitkeni qaitys bolǵan balanyń denesinde kógergen jerleri bar. Biz qazir tolyq saraptamalardy júrgizýin talap etemiz", – dedi qorǵaýshy Aida Danabekova.
Zańger tiisti beinetirkeýdi de ala almai otyrǵanyn aitady. Quzyrly organdardyń buǵan deiin bergen túsinikterine súiensek, avtokólik sheteldik nomermen tirkelgen, sondyqtan ony "Sergek" beinekamerasy arqyly baqylaý múmkin emes.
"Qylmystyq Kodekstiń 345-baby 3-tarmaǵy boiynsha tirkelip, qazirgi tańda anyqtaý basqarmasynyń qyzmetkerleri qylmystyq is aiasynda birqatar saraptamalyq zertteý taǵaiyndady. Osy saraptamalyq zertteýlerdiń nátijesi óndiriske kelgennen keiin Qylmystyq is júrgizý kodeksiniń 190-babyna sáikes, is materialdary sotqa jóneltiledi", – dedi Almaty qalasy PD resmi ókili Saltanat Ázirbek.
Istiń ara-jigi ajyratylmady deýge áli erte. Óitkeni, buǵan deiin 2 sot otyrysy ótken. Alda áli birneshe tyńdalym bar.
