Foto: Almaty ákimdigi
Almatyda Naýryznama onkúndiginiń úshinshi kúni – Mádeniet jáne ulttyq salt-dástúr kúnine orai qala teatrlarynyń artisteri aýqymdy fleshmob ótkizip, «Qara jorǵa» biin biledi, dep habarlaidy Ult.kz.
Qala ákimdiginiń málimetinshe, merekelik performanstyń bastamashysy – Nataliia Sats atyndaǵy teatr. Is-shara Qazaqstan Respýblikasy Mádeniet jáne aqparat ministrligi men Almaty qalasy ákimdiginiń qoldaýymen uiymdastyryldy.
Fleshmobqa megapolistegi birneshe jetekshi teatr ujymdary qatysty. Atap aitqanda, Ǵ. Músirepov atyndaǵy Qazaq memlekettik akademiialyq balalar men jasóspirimder teatry, M. Lermontov atyndaǵy Memlekettik akademiialyq orys drama teatry, Q. Qojamiiarov atyndaǵy respýblikalyq memlekettik akademiialyq uiǵyr mýzykalyq komediia teatry, respýblikalyq akademiialyq korei mýzykalyq komediia teatry jáne respýblikalyq akademiialyq nemis drama teatrynyń akterleri bir sahnada óner kórsetti.
Sharanyń ereksheligi – fleshmobqa kásibi bishiler emes, drama teatrlarynyń akterleri qatysqan. Olar nebári bir apta ishinde «Qara jorǵa» biiniń qimyldaryn meńgerip, ulttyq bi arqyly kórermenge merekelik kóńil kúi syilady.
Jobaǵa QR «Saltanat» memlekettik bi ansambli arnaiy horeografiia ázirlep, kásibi qoldaý kórsetti. Al Almaty TV teleradiokompaniiasy is-sharanyń aqparattyq seriktesi retinde túsirilim jumystaryn uiymdastyryp, mediialyq qoldaý kórsetken.
Uiymdastyrýshylardyń aitýynsha, túrli etnostar men shyǵarmashylyq mektepterdiń ókilderin biriktirgen «Qara jorǵa» bii dostyqtyń, ulttyq muraǵa degen qurmettiń jáne Almatynyń mádeni keńistigindegi birliktiń simvolyna ainaldy.
