Almaty mańyndaǵy taýlarda týristerdiń turýyna arnalǵan lashyqtarda Wi-Fi paidalanýǵa, telefondy qýattaýǵa, dári qobdishasy men azyq-túlik jiyntyǵyn alýǵa bolady. Bul týraly onlain brifing barysynda qalalyq týrizm basqarmasynyń basshysy Sabina Amankeldi málim etti, dep habarlaidy "Ult aqparat".
Basqarma basshysynyń aitýynsha, sońǵy 3 jylda megapoliske jaqyn ornalasqan taý shatqaldaryna qala turǵyndary men qonaqtary jii baraǵan. Taý týrizmine degen qyzyǵýshylyq ásirese pandemiia kezinde arta túsken.
«Qala ákimi Baqytjan Saǵyntaevtyń tapsyrmasy boiynsha Almaty turǵyndary men qonaqtarynyń qaýipsiz jáne jaily demalýy úshin qajetti jaǵdailar jasaý jospary ázirlendi.Taý baǵyttarynyń shalǵai toraptyq ýchaskelerinde jazdyń sońyna deiin týrister turatyn 15 lashyq salynady. Búginde daiyndyq jumystary júrip jatyr. Sondai-aq, qutqarý otriadtary úshin dabyl túimeleri bar 10 radiorelelik dińgek ornatylady», - dedi Sabina Amankeldi.
Sonymen qatar, lashyqta týrister túnep, sýyq kúni jylynýǵa múmkindik alady.
Alǵashqy meditsinalyq kómek jinaǵy, marshrýt kartalary, mobildi telefonda qýattaityn qurylyǵy men jyly kórpe jáne azyq-túlik jiyntyǵy bolady.
«Qazirgi kezde taý qaýymdastyǵymen birlesip kelesi shatqaldarda lokatsiialar pysyqtalýda. Atap aitar bolsam, orta jáne Talǵar, Kimasar, Túiik-Sý, joǵarǵy Gorelnik, Úlken Almaty shatqaly, Shúkir jáne Prohodnoe», - dedi spiker.
Jalpy, týristik navigatsiianyń biryńǵai júiesin qurý jáne taýǵa shyǵý úshin TAU Go smart-navigatory túrindegi qosymshany iske qosý boiynsha jumys júrgizilýde, ol tqtenshe jaǵdailar departamenti bazasymen integratsiialanatyn bolady.
Kishi jáne Úlken Almaty shatqaldarynda taý qutqarýshylarynyń jasaǵy táýlik boiy kezekshilik etedi, sondai-aq «Tuiyqsý» shatqalynda tikushaq alańy uiymdastyrylady.
Onyń aitýynsha, týrizm basqarmasy júieli negizde baǵyttardy abattandyrýda.
Búginde 500 shaqyrym jol abattandyrylyp, 1000 shaqyrym taý joldary tsifrlandyryldy.
«Baǵyttar boiynsha 26 aqparattyq stend, 154 kórsetkish, 80 aqparattyq qalqan, 14 aqparattyq baǵan, 163 oryndyq jáne 68 kúrke ornatyldy. Barlyq navigatsiialyq stendterde QR-kodtary bar, onda týrister marshrýttyń kúrdeliligimen, onyń uzaqtyǵymen jáne ótý ýaqytymen tanysa alady», - dep atap ótti ol.
Biyl jalpy uzyndyǵy 172 shaqyrym bolatyn Úlken jáne Kishi Almaty shatqalyndaǵy jaiaý taý joldary qosymsha abattandyrylady.
Aita keteiik, jyl basynan beri taýdaǵy jedel-qutqarý jasaǵynyń mamandary 26 adamdy qutqardy.
