Baqytjan Saǵyntaev «Almaty» telearnasynyń tikelei efirinde sel aǵystary men órt bolǵan kezde qalanyń qaýipsizdigin qamtamasyz etý sharalary jóninde aitty, dep habarlaidy QazAqparat.
Mamandardyń usynystaryna sáikes taýly aýdandarda sel qaýipsizdigin qamtamasyz etý júiesi modernizatsiialanýda. Bul klimattyń ózgerýine, seldiń áserine ushyraǵan aýmaqtar shekaralarynyń keńeiýine, sonymen qatar sel qubylystary týraly jańa bilimderdiń jinaqtalýyna, selden qorǵaý qurylymdarynyń tiimdiligine, jańa tehnologiialardyń paida bolýyna bailanysty.
Qala mańynda 45 morendi kól bar, onyń 15-i turaqsyz dep sanalady, al 8-i óte qaýipti, munda jyl saiyn olardy bosatý úshin preventivti jumystar júrgiziledi.
«Sondai-aq, Aiýsai jáne Aqsai shatqaldarynda 2023 jylǵa deiin aiaqtaýly tiis eki sel bógetiniń qurylysy bastaldy. Bógetterdiń qurylysy 40 myńnan astam halyqtyń jáne infraqurylym men tirshilikti qamtamasyz etetin nysandardyń qaýipsizdigin qamtamasyz etedi. Selge qarsy qaýipsizdikti qamtamasyz etý kezinde zamanaýi tehnikalyq quraldar qoldanylady. Kishi jáne Úlken Almaty, Qarǵaly jáne Aqsai ózenderiniń basseinderinde sel monitoringiniń avtomattandyrylǵan júiesin engizý boiynsha jumystar júrýde»,- dedi Baqytjan Saǵyntaev.
Joba aiasynda «Qazseldenqorǵaýda» jáne Tótenshe jaǵdailar departamentinde avtomattandyrylǵan jumys oryndary bar 31 stantsiia salynýda. 2019 jyly 10 stantsiia iske qosyldy, qalǵan 21-i biyl paidalanýǵa beriledi.
«Órt qaýipsizdigin qamtamasyz etý maqsatynda qalada qajetti infraqurylymdy qurý boiynsha sharalar qabyldanyp jatyr. Sońǵy 5 jylda 58 birlik avtokólik satyp alyndy. Biyl qosymsha 40 birlik satyp alý josparlanyp otyr, bul órt sóndirý mashinalary parkiniń jabdyqtalýyn 52%-dan 65%-ǵa deiin arttyrady»,- deidi qala basshysy.
Sonymen qatar, ol qalanyń ósip kele jatqan aýmaqtarynda qaýipsizdikti qamtamasyz etý maqsatynda órtke qarsy tolyq aýqymdy jáne tiimdi jumys jasaý úshin 18 depo salý qajet ekenin atap ótti. Qazirdiń ózinde úsh órt sóndirý deposynyń qurylysy júrip jatyr, Alataý jáne Naýryzbai aýdandaryndaǵy eki deponyń qurylysy aiaqtalyp qaldy.
