Almaty oblysynyń ákimi Amandyq Batalov pandemiiamen kúreste qandai jumys atqarylǵanyn aityp berdi, dep habarlaidy QazAqparat.
«Pandemiia kezinde qiyndyqtar boldy, tapshylyq baiqaldy. Ottegi bolmady, emdeý isi durys júrgizilmedi. Prezidenttiń tapsyrmasymen barlyq kemshilikterdi eskere otyryp, pandemiiamen kúresý úshin barlyq meditsinalyq mekemelerimizdi sáikestendirýge 14 mlrd teńge bóldik. 180 jedel járdem kóligi satyp alyndy. Barlyq 17 aýrýhana qaita jabdyqtalyp, 17 ottegi stansasy salyndy. 200 tósek-oryndy juqpaly aýrýlar aýrýhanasy salyndy. Munyń bári jaqsy nátije berdi. Naýqastar sany eń joǵary kezde de buryn myń tósek-orynmen qamtysaq, qazir 5 myńǵa deiin oryn bar», - dedi A. Batalov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, infektsiialyq statsionarlardaǵy tósek-oryn júktemesi 55-57%-dan aspaidy.
«Bul kórsetkish qazir 31%-ǵa deiin tómendedi. Juqpaly aýrýlar bólimshelerindegi naýqastar sany 10%-dan aspaidy. Eń basty kórsetkish – ólim-jitim tómendedi. Dári jetispeýshiligi týraly aitylǵan edi, qazir bizde dári-dármektiń eki ailyq qory bar. Biz 9 mlrd teńgeden qajetti qarajat bóldik. Jeke qorǵanys quraldary boiynsha da taýsylmaityn qor bar», - dedi Amandyq Batalov.
