Almaty oblysynyń ákimi Amandyq Batalov óńirdiń áleýmettik-ekonomikalyq damý kórsetkishterin baiandady, dep habarlaidy QazAqparat.
«Indet saldarynan týyndaǵan daǵdarysqa qaramastan, turaqty damý printsipteriniń basymdyǵy saqtaldy. Sondyqtan Memleket basshysy ekonomikalyq damýdyń joǵary qarqynyn qalpyna keltirý, investitsiia tartý men halyqtyń tabysyn arttyrý mindetterin alǵa qoidy. Jyl basynan bergi 4 aida oblysta barlyq negizgi salalarda ósim qamtamasyz etildi. Ónerkásip óndirisiniń kólemi 15,3%-ǵa, qurylys jumystary – 4,2%-ǵa, saýda – 3,7%-ǵa, aýyl sharýashylyǵy – 0,5%-ǵa ulǵaidy», - dedi A. Batalov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Ákimniń aitýynsha, memleket biýdjetine 220 mlrd teńge mólsherinde túsim túsken, bul ótken jyldyń osy kezeńimen salystyrǵanda 1,5 esege kóp (151 mlrd teńge).
Oblys ekonomikasyna 1,6% ósimmen 127 mlrd teńge investitsiia tartyldy. Jyl sońyna qarai investitsiia kólemi 811 mlrd teńge deńgeiinde boljanýda.
«2025 jylǵa qarai jalpy ishki ónimdegi investitsiia kólemin 30% deiin ulǵaitý mindetterin oryndaý úshin 45 myń jumys ornyn quratyn, 5,4 trln teńgelik 562 jobadan turatyn investitsiialyq portfel qalyptasty. Onyń 327-si júzege asyp jatyr, olar turaqty investitsiia legin qamtamasyz etedi. Munda 9 Transulttyq kompaniia óziniń eleýli úlesin qosty. Ótken jyldardan beri jumys istep turǵan «Mareven Fýd», «Lýkoil», «Willo» kásiporyndary men biyl iske qosylǵan «Alatsem» tsement zaýyty men «Fid Mills» qurama jem zaýyty óndiristeriniń jalpy kólemi 165 mlrd teńgeni kórsetti. Aldaǵy ýaqytta transulttyq kompaniialardyń taǵy 5 jobasy iske qosylǵanda olardyń jalpy ónerkásip óndirisindegi úlesi 25% bolady», - dedi A. Batalov.
