Óndirýshiler Almaty saýda jelilerine tikelei azyq-túlik jetkizetin bolady. Bul týraly Almatynyń biznes shtaby habarlady. Sonymen qatar JLC kompaniiasy Almatyǵa sút jáne sút ónimderin tikelei jetkizý týraly ýaǵdalastyqqa qol jetkizdi, - dep habarlaidy «Ult aqparat».
Shtabtyń aqparatyna sáikes, Almaty men Almaty oblysynyń ákimdikteri áleýmettik mańyzy bar azyq-túlik taýarlaryn úzdiksiz jetkizý boiynsha ózara yntymaqtastyq týraly Memorandýmǵa qol qoidy. Bul týraly qala ákimdigi málim etti.
"Almaty ákimi Baqytjan Saǵyntaevtyń tapsyrmasy boiynsha alǵash ret Almaty oblysynyń taýar óndirýshilerinen azyq-túlik ónimderin tikelei jetkizý boiynsha ýaǵdalastyqqa qol jetkizildi. Endi fermerler Almatyǵa kókónister, qant, sút ónimderi, qus eti, jumyrtqa, makaron ónimderi men basqa da azyq-túlik taýarlaryn jetkizetin bolady", - delingen ákimdik taratqan aqparatta.
Sonymen qatar bul jetkizilimderdi óndirýshiler qalanyń saýda jelileri men bazarlaryna deldaldardyń uzaq tizbeginsiz tikelei júzege asyrady.
"Biz sondai-aq usynylǵan baǵalarǵa sáikes jetkizilimderdi júzege asyrý jáne jetkiziletin ónim baǵasynyń negizsiz kóterilýine jol bermeý týraly kelistik", - dep habarlady Almaty ákiminiń orynbasary Maqsat Kikimov.
Aita keteiik, jalpy Almatyda azyq-túlik taýarlarynyń baǵasyn turaqtandyrý úshin azyq-túlik taýarlarynyń 15 ataýyn tirkelgen tómendetilgen baǵamen satyp alý jáne satý úshin "Magným" jáne "Toimart" iri saýda jelilerine jeńildetilgen qaryzdar berildi.
Al onyń aldynda respýblika boiynsha birqatar azyq-túliktiń baǵasy qymbattady. Soǵan bailanysty ulttyq kásipkerler palatasynyń mamandary pikir bildirdi.
Ulttyq palata kartop baǵasynyń ósýi ónimniń maýsymdylyǵyna bailanysty ekenin túsindirdi, jaqyn arada baǵalar turaqtanady dep sendirdi. Alaida basqa azyq-túlik baǵasynyń ósýin de joqqa shyǵarmady.
"Atameken" UKP AÓK jáne tamaq ónerkásibi departamentiniń direktory Erbol Eseneev maýsymda sórelerde jatqan kartop bul ótken eginniń qaldyqtary, naryqtaǵy jas kartop satyp alýshylardyń suranysyn qanaǵattandyrý úshin jetkiliksiz ekenin jetkizdi.
"Sonymen qatar ónimniń ózindik qunyna kólik shyǵyndary kiredi jáne shyǵý kezinde biz ónimniń baǵasyn kóterdik. Máselen, Túrkistan oblysynyń fermerlerinde kartoptyń kilogramy 200-210 teńge turady, árine, naryqta bólshek saýdada ol qymbatyraq. Óndiristiń ósýine qarai baǵa tómendeidi, kúzde kartoptyń baǵasy eń tómen bolady", - dedi Erbol Eseneev.
Aita keteiik, búginde Qazaqstanda 4 million tonnaǵa jýyq kartop ósiriledi, ulttyq kásipkerler palatasynyń sarapshysynyń aitýynsha, bul kólem qazaqstandyqtardyń kartopqa degen qajettiligin tolyǵymen jabý úshin jetkilikti.
Ońtústik aimaqtarda kartop pen erte pisetin kókónisterdi jinaý bastaldy. Naryqta jańa ónimderdiń paida bolýy baǵany turaqtandyrady.
Al Almaty qalasynyń ákimdigi osy máseleniń aldyn alyp, baǵanyń turaqty bolýy úshin kelisimge kelýdi oilastyrdy.
Almaty – Qazaqstannyń iri ekonomikalyq ortalyǵy. Turaqsyz ekonomikalyq jaǵdaida megapolis biznes-bastamalar úshin eń perspektivaly investitsiialyq alań bolyp qala beredi. Almaty qalasynyń JÓÓ 2019 jyly 5,3 trillion teńge nemese JIÓ-de 18,6%. JÓÓ-degi ShOK úlesi boiynsha esepti jyly óńir respýblikada 42,9% kórsetkishimen 2-oryndy alady. Bul kórsetkishtiń 2018 jylmen salystyrǵanda 3,0 paiyzdyq tarmaqqa ósý úrdisi baiqaldy.
Almaty qalasynda jumys istep turǵan ShOK sýbektileriniń sany 2020 jylǵy 1 shildedegi jaǵdai boiynsha 195,6 myń birlikti qurady. Shok qurylymynda jeke kásipkerler 61,1%-dy, shaǵyn kásipkerliktiń zańdy tulǵalary 38,1%-dy qurady.
