Qazaqstandyq Allur avtokólik kompaniiasynda jas qyzmetkerlerdiń bastamalary naqty qoldaý taýyp, júzege asyp keledi. Jastardy biznes jáne áleýmettik jobalarǵa tartýǵa baǵyttalǵan Allur Zhastary baǵdarlamasy aiasynda volonterlik qozǵalys qurýdy usynyldy. Kompaniia basshylyǵy bul bastamany qoldap, nátijesinde jumysshy jastardy qoǵam damýyna naqty úles qosýǵa biriktiretin «Eńbek Jastary» qozǵalysy paida boldy.
Bul ideia birtindep qalyptasyp otyr. Allur jas mamandary birneshe jyldan beri óz bastamalarymen senbilik uiymdastyryp, oqýshylarǵa jumysshy mamandyqtar týraly aityp, jergilikti ekologiialyq aktsiialarǵa qatysyp kelgen. Búginde bul bastamalar jańa deńgeige kóterilip, «Eńbek Jastary» atty biryńǵai aýqymdy platformaǵa biriktirildi.
Qozǵalystyń iske qosylýy Qazaqstanda volonterliktiń qoǵamdyq institýt retindegi róli kúsheiip kele jatqan kezeńmen tuspa-tus kelip otyr. Bul baǵyt el damýynyń konstitýtsiialyq logikasynda da kórinis tabady. Iaǵni azamattardyń yntymaqtastyqqa, ózara kómekke jáne azamattardyń mańyzdy mindetterdi sheshýge belsendi qatysýyna basymdyq beriledi.
Bastama Memleket basshysy Qasym-Jomart Toqaev atap ótken eńbekke qurmet, azamattyq belsendilik jáne ár azamattyń el damýyna qosatyn jeke úlesiniń mańyzdylyǵy jónindegi ustanymdarmen úndes. «Eńbek Jastary» «Taza Qazaqstan» qundylyqtarymen sabaqtasady – taza orta, sanaly azamat, naqty is. Sonymen qatar halyqaralyq kontekstide de mańyzǵa ie: Qazaqstannyń bastamasymen BUU 2026 jyldy Volonterlik jyly dep jariialady, bul azamattyq belsendilik pen ózara kómek mádenietiniń ózektiligin aiqyndaidy.
Búgingi tańda qozǵalys Allur jáne Agromash óndiristik kásiporyndarynyń jumysshy jáne injenerlik mamandyq ielerin qosa alǵanda shamamen 300 adamdy biriktirip otyr. Aldaǵy ýaqytta bul bastama atalǵan qundylyqtardy bólisetin jańa qatysýshylarmen tolyǵady.
Qozǵalys aiasynda alǵashqy bastama retinde Qostanai oblysyndaǵy Amanqaraǵai aýylynda jappai orman órtinen zardap shekken aýmaqta aǵash otyrǵyzý aktsiiasy jariialandy. Jobany júzege asyrý úshin «Eńbek Jastary» qatysýshylary bir kúndik jalaqylaryn baǵyttaidy. Osylaisha qozǵalys alǵashqy qadamdarynan bastap naqty áreket formatyn qalyptastyryp otyr: jeke úles – naqty is. Bul týraly qozǵalys músheleri atap ótti.
«Biz syrttai baqylaýshy bolǵymyz kelmeidi. Bul – bizdiń óńirimiz, sondyqtan onyń damýyna ózimizdiń qatysqanymyz mańyzdy. Naqty, qolymyzdan keletin dúnielerden bastaimyz. Jospar kóp. Basshylyqtyń jumys ýaqytynan tys bastamalarymyzdy qoldaýǵa daiyn ekendegi bizge úlken serpin berdi. Endi odan da kóp is jasaýǵa ynta paida boldy. Ekologiialyq jobalar, qoǵamdyq keńistikterdi damytý boiynsha ideialarymyz bar. Sonymen qatar oqýshylarmen jumysty jalǵastyryp, jumysshy mamandyqtardyń qundylyǵyn nasihattaimyz. Endi buǵan kóbirek balany qamti alamyz», – dedi Allur zaýytynyń mashina-kontaktili dánekerleý ýchaskesiniń dánekerleýshisi Dias Berikov.
«Eńbek jastary» qozǵalysynyń Qostanaidan bastaý alýy kezdeisoq emes. Bul – eldiń mańyzdy indýstriialyq ortalyqtarynyń biri. Dál osy jerden jańa baǵyt qalyptasyp otyr: eńbek - sanaly tańdaý, al qoǵam igiligi úshin eńbek etý – jańa býynnyń qalypty qundylyǵyna ainalýda.
«Biz zaýyt qyzmetkerimiz. Osynda óstik, osynda jumys istep kelemiz. Tek resmi jumyspen shektelmei, qoǵamǵa ortaq úlken dúnie jasaǵymyz keledi. Adamnyń tabiǵaty solai ǵoi: qolyńnan is kelse, ony qajet jerge qoldanǵyń keledi. Biz ózimizdi «volonter» dep shektemeimiz. Eń aldymen eńbek adamymyz, biraq eńbekti basqa qyrynan da kórsetýge bolady dep sheshtik. Al basshylyq bizdi qoldady», – dedi Agromash zaýytynyń personaldy basqarý jáne memlekettik organdarmen ózara is-qimyl bóliminiń bas mamany Tomiris Seksenbaeva.
Qozǵalystyń jeke baǵyty retinde jumysshy mamandyqtardyń bedelin arttyrý kózdelip otyr. Bul – oqýshylarmen tikelei kezdesýler, óndiris oryndaryndaǵy ashyq esik kúnderi jáne zamanaýi zaýyttardyń shynaiy beinesin kórsetetin mediakontent arqyly júzege aspaq. «Eńbek Jastary» ókilderiniń pikirinshe, eńbektiń bedeli uranmen emes, naqty úlgimen qalyptasady.
«Eńbek Jastary» qozǵalysy uzaq merzimdi bastama retinde qarastyrylyp otyr. Onyń maqsaty – jumysshy jastar arasynda tájiribelik qatysý mádenietin jáne áleýmettik jaýapkershilikti damytý. Qatysýshylar jobanyń bir rettik aktsiia emes ekenin, ol jańa baǵyttarmen keńeiip, óńir kásiporyndary qyzmetkerleriniń qatysýymen ári qarai damitynyn atap ótedi.
