Alkogol adamdy koronarovirýs infektsiiasynyń taralýy men juqtyrýynan saqtai ala ma? Bul suraqqa Kardiologiia jáne ishki aýrýlar ǵylymi-zertteý institýty kúndizgi statsionar meńgerýshisiniń mindetin atqarýshy, terapevt dáriger Gaýhar Qojakeeva jaýap berdi, dep habarlaidy QazAqparat.
Adam aǵzasyna alkogoldiń keltiretin ziiany týraly taqyryp ár kezde ózekti. Búkil álem COVID-19 pandemiiasynan zardap shegip otyrǵan qazirgi ýaqytta bul taqyryp mańyzdylyǵyn joǵaltpady. Adamdardyń jekelegen toptary arasynda spirt pen alkogol koronavirýs infektsiiasynan saqtai alady degen pikir qalyptasýda. Bul pikirler infektsiia kezinde qoldy, qolmen ustalatyn zattardy spirt eritindisimen nemese quramynda spirti bar mailyqtarmen tazalaý qajettigi týraly nusqaýlarǵa súiene otyryp, alkogol ishimdikterin qabyldaǵan da durys degen oiǵa negizdelip otyr.
Biraq Gaýhar Qojakeevanyń aitýynsha, atalmysh indetti emdeýde alkogol tiimdi degen pikirler qate.
«Spirtti eritindiler jáne quramynda spirti bar mailyqtar spirttiń ártúrli suiyqtyqtar men mailarda jaqsy erip ketý qasietiniń bolýynan zattardy tazalaý úshin paidalanylady. Sondyqtan, ony paidalaný qorǵanýdyń basqa sharalaryna qaraǵanda tiimdirek. Spirttiń kómegimen qolmen lastanǵan, iaǵni teriden bólinetin, quramynda maiy bar zattar jaqsy tazalanady. Mailar mikroorganizmderdiń taralýyna qolaily orta bolyp tabylady. Sondyqtan da teriden bólinetin mailar spirtte tiimdirek eritiletin bolǵandyqtan, túrli meditsinalyq manipýliatsiialar júrgizý kezinde spirt terini mailyqtarmen zalalsyzdandyrylady.
Búginde qaýipti infektsiiany juqtyrýdan qorqý jaǵdaiynda keibir adamdar alkogol ónimderin satyp ala bastady.
«Halyq emi» dep atalatyn ádisterde kóbine azdaǵan spirt qoldanylady. Alaida olardyń quramy birneshe komponentten turady. Biraq taza kúiindegi alkogol adamdy koronarovirýs infektsiiasynyń taralýy men juqtyrýynan saqtai almaidy», - deidi dáriger.
G.Qojakeeva spirttiń joǵary kontsentratsiiasy jáne joǵary dozasy virýstardy joia alatyndyǵyn joqqa shyǵarmaidy. Alaida bul ishimdikke qumarlyqty týdyra otyryp, adam úshin qaýipti bolatyndyǵyn esten shyǵarmaǵan jón.
«Osynyń saldarynan, tipti adam ólimi bolýy yqtimal. Koronavirýs simptomdary aǵzanyń qatty ýlanýyna ákeledi. Al ishimdikti paidalaný osy protsesti ýshyqtyrýǵa jáne aǵzanyń saýyǵyp ketýine keri áserin berýi múmkin. Alkogoldiń jartysy ókpe arqyly shyǵarylady jáne kez kelgen infektsiiada, onyń ishinde koronavirýs infektsiiasynda, ásirese onymen qosa shylym shegiletin bolsa, kerisinshe – asa qaýipti .
Osy keńes úi karantininde jatqan adamdarǵa arnalǵan, sebebi halyqtyń bul bóligi de qazirgi kezde asa osal bolyp otyr. Alkogoldi paidalaný júrekke qosymsha aýyrlyq túsiredi. Bul, adam densaýlyǵy úshin, onyń ishinde júrektiń toqtap qalýyna ákelip soqtyratyn qaýipti faktor. Sonymen qatar alkogol bakteriialar men virýstardyń taralýyna qolaily ortany qalyptastyrady, aǵzanyń túrli aýrýlarǵa qarsy turýyn azaita otyryp, immýnitetti álsiretedi.
Joǵaryda aitylǵandardy qorytyndylai otyryp, alkogol koronavirýs infektsiiasynan qorǵai almaityndyǵyn jáne olardyń adamnyń saýyǵýyna áser etpeitindigin aitqymyz keledi», - deidi meditsina mamany.
Sondai-aq dáriger túshkirý, tamaqtyń aýrýy jáne jybyrlaýy, qurǵaq jótel, murynnyń bitýi, deneniń aýyrýy, dene qyzýynyń joǵarylaýy, tynys alýdyń qiyndaý belgileri paida bolǵan jaǵdaida shuǵyl túrde dáriger shaqyrýǵa keńes berdi.
