Biyl elimizde áleýmettik qyzmetter portaly kómegimen 360 myńnan astam múgedek janǵa qyzmet usynyldy, dep habarlaidy QazAqparat QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
«Elimizde múgedek jandardyń quqyǵyn qorǵaý jáne ómir súrý sapasyn jaqsartý jónindegi ulttyq jospardy iske asyrý sheńberinde áleýmettik qyzmet portaly iske qosyldy. Jáne ol 2025 jylǵa deiin kezeń-kezeńimen engiziledi. Sondai-aq, portal qoldanýshyǵa ońaltýdyń tehnikalyq quraldary men qyzmetin derbes tańdaýǵa múmkindik beredi. Kez kelgen qyzmetke qol jetkizý úshin aldymen elektrondyq tsifrlyq qoltańbany rastaý talap etiledi. Sol siiaqty qyzmetti alý merzimin 6 aidan 15 kúnge deiin qysqartty. Qoldanýshylardyń máselesin jyldam sheshý úshin eńbek resýrstaryn damytý ortalyǵymen tikelei bailanys qurylǵan», - delingen habarlamada.
Sondai-aq, biyl 7 shildeden bastap ótinishterdi qabyldaityn 1414 nómirli call ortalyǵy iske qosyldy.
«Turǵyndardan qońyraýlar tegin qabyldanady. Bailanys ortalyǵyna kelip túsken portal jumysyna qatysty suraqtar men usynystarǵa ortalyq mamany óńdep oǵan jaýap beredi. Jalpy biyl áleýmettik qyzmetter portaly arqyly 360 myńnan astam múgedek jan qyzmet aldy. Odan bólek, jyl basynan beri 266 myńnan astam múgedektigi bar adam atalǵan portal arqyly ońaltýdyń tehnikalyq quraldary, 6 myńnan astam ymdaý tili qyzmeti, 33 myńnan astam jeke kómekshiniń qyzmetin, 55 myńǵa jýyq jan shipajaida em aldy. Búginde portalda arnaýly áleýmettik qyzmet kórsetetin 795 meditsinalyq-áleýmettik mekeme tirkelgen», - deidi atalǵan vedomstvodan.
