Foto ©️ Tengrinews.kz / Alihan Sariev
eGov Mobile mobildi qosymshasynda ómirlik qiyn jaǵdaiǵa tap bolǵan azamattar úshin áleýmettik kómek alý qyzmeti iske qosyldy, dep habarlaidy "Ulttyq aqparattyq tehnologiialar" AQ baspasóz qyzmeti.
Buǵan deiin bul qyzmet tek eGov.kz portalynda bolǵan. Endi ótinishti tikelei smartfonnan jiberýge bolady.
Qyzmetti paidalaný tártibi:
eGov Mobile mobildi qosymshasyna kirip, "eGov memlekettik qyzmetter" – "Arnaiy qyzmetter" bólimine ótý;
"Jergilikti ókildi organdardyń sheshimderi boiynsha muqtaj azamattardyń jekelegen sanattaryna áleýmettik kómek taǵaiyndaý" qyzmetin tańdap, qajetti derekterdi toltyrý;
qol qoiýdyń qoljetimdi tásilderiniń birimen ótinimdi rastaý;
"Qyzmetter tarihy" bóliminde ótinishtiń óńdelý mártebesi týraly habarlamamen tanysý.
Ótinish ýákiletti organda qaralady. Al sheshim otbasynyń tabys deńgeiin jáne belgilengen ózge de ólshemderdi eskere otyryp qabyldanady. Ótinishti qaraý merzimi – 8 jumys kúnine deiin. Osy ýaqyttyń ishinde áleýmettik kómektiń taǵaiyndalǵany týraly habarlama nemese ótinishtiń qanaǵattandyrylmaǵany jaiynda jaýap keledi.
Aita keteri, áleýmettik kómek – bul ómirlik qiyn jaǵdaiǵa tap bolǵan azamattardyń jekelegen sanattaryna jergilikti atqarýshy organdar tarapynan kórsetiletin aqshalai tólem nemese materialdyq qoldaý.
Máslihattyń sheshimi boiynsha áleýmettik kómek qosymsha qoldaýǵa muqtaj azamattarǵa, sonyń ishinde áleýmettik mańyzy bar aýrýlary bar adamdarǵa, óz-ózine qyzmet kórsete almaityn egde jastaǵy azamattarǵa, ata-anasynyń qamqorlyǵynsyz qalǵan tulǵalarǵa, sondai-aq tabysy tómen otbasylarǵa kórsetiledi.
